کولکاتہ، 4 ستمبر (ہ س)۔

مغربی بنگال کی وزیر اعلیٰ ممتا بنرجی نے ہریانہ میں ہلاک ہونے والے مہاجر مزدور صابر ملک کی اہلیہ شکیلہ سردار ملک کو نوکری دے دی ہے۔ شکیلہ بدھ کو اپنی چار سالہ بیٹی کے ساتھ نواں میں وزیر اعلیٰ سے ملنے آئی تھیں۔ چونکہ صابر ملک جنوبی 24 پرگنہ ضلع کے بسنتی کے رہنے والے تھے، اس لیے ان کی بیوی کو بسنتی بلاک کے اراضی اور زمینی اصلاحات کے محکمے میں نوکری دی گئی ہے۔ شکیلہ کو پہلے اس محکمے میں بطور اٹینڈنٹ تعینات کیا جائے گا اور ایک سال بعد اسے گروپ ڈی میں ترقی دی جائے گی۔ وزیر اعلیٰ ممتا بنرجی نے بدھ کو شکیلہ کو تقرری کا لیٹر سونپا۔

قابل ذکر ہے کہ صابر ملک کو 27 اگست کو ہریانہ کے چرخی دادری ضلع کے بدھرا تھانہ علاقے میں پیٹ پیٹ کر ہلاک کر دیا گیا تھا۔ صابر کام کرنے کے لیے جنوبی 24 پرگنہ کے بسنتی سے ہریانہ گیا تھا۔ گائے کا گوشت کھانے کے شبہ میں اسے پیٹ پیٹ کر ہلاک کر دیا گیا۔ اس واقعہ کے بعد وزیر اعلیٰ ممتا بنرجی نے صابر کے خاندان کے ایک فرد کو نوکری دینے کا وعدہ کیا تھا جسے انہوں نے 10 دن کے اندر پورا کیا۔

ترنمول کانگریس کے ترجمان کنال گھوش نے پیر کی صبح سوشل میڈیا کے ذریعے وزیر اعلیٰ کے اس فیصلے کی جانکاری دی۔ واقعہ کے بارے میں جاننے کے بعد، ممتا بنرجی نے ترنمول کانگریس کے ایک وفد کو متاثرہ کے خاندان سے ملنے کے لئے بھیجا تھا۔اتوار کو ترنمول کانگریس کے راجیہ سبھا ممبر پارلیمنٹ سمیر الاسلام سمیت ایک وفد نے بسنتی جا کر صابر کے اہل خانہ سے ملاقات کی۔

ہریانہ پولیس کے مطابق صابر ملک بدھرا میں ایک کچی آبادی میں رہتا تھا اور اپنی روزی کمانے کے لیے کچرا جمع کرتا تھا۔ 27 اگست کو ان پر گائے کا گوشت کھانے کے شبہ میں حملہ کیا گیا تھا۔ اگلے دن بدھرا پولیس اسٹیشن میں ایف آئی آر درج کرائی گئی۔ پولیس نے اس معاملے میں ایک نابالغ سمیت کئی ملزمین کو گرفتار کیا ہے۔

ہندوستھان سماچار

ہندوستان سماچار / عطاءاللہ