کارگل، 26 جولائی ( ہ س)۔ پچیسویں کارگل وجے دیوس پر آج وزیر اعظم نریندر مودی نے دراس میں کارگل وار میموریل میں کارگل جنگ کے شہیدوں کو خراج عقیدت پیش کیا۔ اس موقع پر وزیر اعظم مودی نے کہا کہ کارگل وجے دیوس اس بات کا گواہ ہے کہ قوم کے لیے دی گئی قربانیاں لازوال ہیں۔ کارگل میں ہم نے صرف جنگ نہیں جیتی تھی۔ سچ کی بھی جیت ہوئی تھی۔ اس وقت بھارت امن کے لیے کام کر رہا تھا۔ پاکستان نے دھوکہ دیا۔
وزیر اعظم مودی نے کہا کہ 26 جولائی 1999 کو ہندوستان نے کارگل جنگ جیت لی تھی۔ آج لداخ کی یہ عظیم سرزمین کارگل وجے دیوس کی 25ویں سالگرہ کا مشاہدہ کر رہی ہے۔ مجھے یاد ہے کہ ہماری افواج نے اتنی اونچائی پر کیسے مشکل جنگی کارروائیاں انجام دیں۔ میں ملک کو فتح دلانے والے ایسے تمام بہادروں کو احترام کے ساتھ سلام کرتا ہوں۔ میں ان شہیدوں کو سلام پیش کرتا ہوں جنہوں نے کارگل میں مادر وطن کی حفاظت کے لیے عظیم قربانیاں دیں۔ وزیراعظم نے کہا کہ پاکستان کو اس جنگ میں شکست کا منہ دیکھنا پڑا لیکن پاکستان نے اپنی تاریخ سے کچھ نہیں سیکھا۔
اس کے بعد وزیر اعظم مودی نے ورچوئلی شنکن لا ٹنل پروجیکٹ کا پہلا دھماکہ کیا۔ یہ سرنگ لداخ کو ہر موسم میں رابطہ فراہم کرے گی۔ اس ٹنل پروجیکٹ میں 4.1 کلومیٹر لمبی ٹوئن ٹیوب ٹنل بھی شامل ہے، جو نیمو پدم-دارچہ روڈ پر تقریباً 15,800 فٹ کی بلندی پر تعمیر کی جائے گی۔ اس سے لیہہ کو ہر موسم میں رابطہ فراہم کیا جا سکے گا ۔ یہ دنیا کی بلند ترین سرنگ ہوگی۔ شنکن لا ٹنل نہ صرف ہماری مسلح افواج اور آلات کی تیز رفتار اور موثر نقل و حرکت کو یقینی بنائے گی بلکہ لداخ میں اقتصادی اور سماجی ترقی کو بھی فروغ دے گی۔
ہندوستھان سماچار
ہندوستان سماچار / محمد شہزاد
