جموں ،25 اپریل (ہ س)۔
جموں و کشمیر پولیس نے جموں بس اسٹینڈ علاقے سے دو منشیات فروشوں کو لاکھوں مالیت کی ہیروئن کے ساتھ گرفتار کیا ہے۔ پولیس ترجمان نے جمعرات کو یہاں بتایا کہ آپریشن سنجیونی کے تحت منشیات کی اسمگلنگ اور منشیات کے استعمال کے خلاف اپنی مہم کو جاری رکھتے ہوئے، جموں پولیس نے بس اسٹینڈ کے علاقے میں دو منشیات فروشوں سے 169 گرام ہیروئن برآمد کرکے بڑی کامیابی حاصل کی۔ انہوں نے مزید کہا کہ بدھ کی رات انسپکٹر وکاس ڈوگرا، اسٹیشن ہاؤس آفیسر، اور پولیس اسٹیشن بس اسٹینڈ کی قیادت میں ایک پولیس ٹیم نے ٹاؤن ہال روڈ کے قریب ایک ناکے کے دوران دو منشیات فروشوں کو گرفتار کیا اور ان کے قبضے سے 169 گرام ہیروئن برآمد کی۔ گرفتار افراد کی شناخت ماجد چودھری اور محمد وقار سکنہ ضلع راجوری کے طور پر ہوئی ہے ۔اس ضمن میں پولیس نے متعلقہ دفعات کے تحت مقدمہ درج کر کے تفتیش شروع کر دی ہے۔ ترجمان نے کہا کہ جموں پولیس خطے میں منشیات کی سپلائی کی بنیاد کو جڑ سے اکھاڑ پھینکنے کے لیے پوری شدت سے کام کر رہی ہے، اور منشیات کی سپلائی چین کی اصلیت جاننے کے لیے ملزم سے مکمل پوچھ گچھ جاری ہے۔ انہوں نے کہا کہ جموں پولیس لوگوں بالخصوص نوجوانوں کو منشیات کی لعنت کو ختم کرنے کی ضرورت سے آگاہ کرنے کے لیے ہر ممکن کوشش کر رہی ہے اور ہر ممکن قدم اٹھا رہی ہے۔ لوگوں سے درخواست ہے کہ وہ آگے آئیں اور منشیات فروشوں کے ساتھ ساتھ نشے کے عادی افراد کے بارے میں معلومات متعلقہ پولیس کے ساتھ شیئر کریں، جبکہ ان کی شناخت کو خفیہ رکھا جائے گا۔
اصغر/ہندوستھان سماچار
/عطاءاللہ
