کولکاتہ ، 25 اپریل (ہ س)۔

وزیر اعلیٰ ممتا بنرجی کے خلاف مقدمہ درج کیا گیا ہے، جو اساتذہ کی تقرری بدعنوانی کے معاملے میں کلکتہ ہائی کورٹ کے فیصلے پر مسلسل سوال اٹھا رہی ہیں۔ ان کے خلاف توہین عدالت کا مقدمہ سینئر وکیل وکاس رنجن بھٹاچاریہ نے دائر کیا ہے۔ بھٹاچاریہ نے جمعرات کو چیف جسٹس ٹی ایس سیواگننم کی صدارت والی ڈویژن بنچ کی توجہ اس طرف مبذول کرائی۔ انہوں نے استدعا کی ہے کہ عدالت اس معاملے میں ازخود کارروائی کرے۔وکاس نے جمعرات کو کہا کہ مجرمانہ تبصرے کیے جا رہے ہیں۔ کارروائی نہ ہوئی تو سب عدلیہ پر ہنسیں گے۔ ممتا کہہ رہی ہیں کہ ہائی کورٹ کے فیصلے پر بی جے پی کا اثر ہے۔ وکاس رنجن بھٹاچاریہ نے کہا کہ جج اپنی صوابدید اور قانون کے مطابق کام کرتے ہیں۔ لیکن پورا ہائی کورٹ بک گیا ، یہ تبصرہ کیوں ؟ عدالت کی توہین کی جا رہی ہے۔چیف جسٹس شیوگنانم اور جسٹس ہیرنموئے بھٹاچاریہ کی ڈویڑن بنچ نے کہا کہ اس سلسلے میں ایک حلف نامہ دیا جانا چاہئے۔

قابل ذکر ہے کہ ممتا بنرجی نے ٹیچر تقرری بدعنوانی کیس میں 26 ہزار لوگوں کی نوکریوں کو منسوخ کرنے کے ہائی کورٹ کے فیصلے پر لگاتار سوالات اٹھائے ہیں۔ انہوں نے کہا کہ یہ فیصلہ بی جے پی کے کہنے پر دیا گیا ہے۔

ہندوستھان سماچار