نئی دہلی، 27 دسمبر (ہ س)۔ صدرجمہوریہ دروپدی مرمو، نائب صدر جگدیپ دھنکھڑ اور وزیر اعظم نریندر مودی نے جمعہ کو سابق وزیر اعظم ڈاکٹر منموہن سنگھ کو 3 موتی لال نہرو روڈ پر واقع ان کی رہائش گاہ پر جا کر خراج عقیدت پیش کیا۔

راشٹرپتی بھون نے ایک پوسٹ میں کہا کہ صدر مرمو نے سابق وزیر اعظم ڈاکٹر منموہن سنگھ کی رہائش گاہ پر جا کر انہیں خراج عقیدت پیش کیا۔ انہوں نے ڈاکٹر سنگھ کے اہل خانہ سے بھی تعزیت کا اظہار کیا۔

نائب صدر سکریٹریٹ نے ایکس پوسٹ میں کہا کہ نائب صدر جگدیپ دھنکھڑ اور ڈاکٹر سدیش دھنکھڑ نے آج نئی دہلی میں سابق وزیر اعظم ڈاکٹر سنگھ کی رہائش گاہ پر جاکر انہیں خراج عقیدت پیش کیا۔ انہوں نے ڈاکٹر سنگھ کے اہل خانہ سے اپنی گہری تعزیت کا اظہار کیا اور ملک کے لیے ان کی انمول شراکت اور ان کی لازوال میراث کو یاد کیا۔

وزیر اعظم نریندر مودی نے اپنے ایکس پوسٹ میں کہا، ڈاکٹر منموہن سنگھ کی رہائش گاہ پر گئے اور انہیں خراج عقیدت پیش کیا۔ ہندوستان ان کے تعاون کو ہمیشہ یاد رکھے گا۔

قابل ذکر ہے کہ سابق وزیر اعظم سنگھ کا کل رات نئی دہلی کے آل انڈیا انسٹی ٹیوٹ آف میڈیکل سائنسز میں انتقال ہو گیا تھا۔ ان کی عمر 92 برس تھی۔

ہندوستھان سماچار

ہندوستان سماچار / عطاءاللہ