نئی دہلی، 21 دسمبر (ہ س)۔

وزیر اعظم نریندر مودی کا ہفتہ کو کویت پہنچنے پر امیر کویت کے ساتھ ساتھ ہندوستانی تارکین وطن اور کویتی شہریوں نے پرتپاک استقبال کیا۔ وزیر اعظم مودی نے 101 سالہ سابق آئی ایف ایس افسر منگل سین ہانڈا اور عبداللطیف النصیف سے بھی ملاقات کی جنہوں نے عربی زبان میں رامائن اور مہابھارت شائع کی تھی۔

وزیر اعظم مودی نے ٹویٹر پر ایک پوسٹ میں کہا کہ کویت پہنچتے ہی ان کا پرتپاک استقبال کیا گیا۔ 43 سالوں میں کسی ہندوستانی وزیر اعظم کا یہ پہلا دورہ ہے اور بلاشبہ مختلف شعبوں میں ہندوستان-کویت دوستی کو مضبوط کرے گا۔

وزارت خارجہ نے ایک بیان میں کہا کہ ایک نئے باب کا آغاز ہو رہا ہے۔ وزیر اعظم نریندر مودی کا کویت میں باضابطہ استقبال کیا گیا۔ ہوائی اڈے پر کویت کے پہلے نائب وزیر اعظم شیخ فہد یوسف سعود الصباح، کویت کے وزیر خارجہ عبداللہ علی الیحییٰ اور کئی دیگر وزراء اور معززین نے ان کا پرتپاک استقبال کیا۔

وزیر اعظم مودی نے کویت کے ایک ہوٹل میں ہندوستانی تارکین وطن سے بات چیت کی۔ تارکین وطن نے مودی کے اعزاز میں جنوبی ہندوستانی رقص کا پروگرام منعقد کیا۔

این آر آئی کمیونٹی کے ساتھ بات چیت کے دوران وزیر اعظم مودی نے 101 سالہ سابق آئی ایف ایس افسر منگل سین ہانڈا سے بھی ملاقات کی۔ منگل سین ہانڈا کی پوتی نے سوشل میڈیا پر پوسٹ کرکے ملاقات کی اپیل کی تھی، جس کا وزیراعظم نے مثبت جواب دیا اور کہا کہ وہ بھی منگل سین سے ملنے کے لیے بے چین ہیں۔

وزیر اعظم مودی نے عربی میں رامائن اور مہابھارت شائع کرنے والے عبداللطیف النصیف اور مترجم عبداللہ بیرن سے بھی ملاقات کی۔

ہندوستھان سماچار

ہندوستان سماچار / عطاءاللہ