نئی دہلی، 21 دسمبر (ہ س)۔ وزیر اعظم نریندر مودی نے کہا کہ ہندوستان آج دنیا کا ہنر مندانہ سرمایہ بننے اور مہارت کی طلب کو پورا کرنے کی صلاحیت رکھتا ہے۔ ہندوستانی اسٹارٹ اپس اور فنٹیکس کویت کی ہر ضرورت کے لیے جدید حل تیار کرسکتے ہیں، صحت کی دیکھ بھال سے لے کر اسمارٹ شہروں اور گرین ٹیکنالوجی تک۔ ہندوستان کے روشن نوجوان کویت کے مستقبل کے سفر کو بھی نئی طاقت دے سکتے ہیں۔ وزیراعظم آج دو روزہ دورے پر کویت پہنچے جہاں ان کا پرتپاک استقبال کیا گیا۔ اس دوران ہندوستانی برادری سے وابستہ لوگوں نے ان کا استقبال کیا۔
یہاں ہندوستانی برادری سے خطاب کرتے ہوئے وزیر اعظم نے کہا کہ ہندوستان کی حکومت بیرون ملک کام کرنے والے ہندوستانیوں کی بہبود کے لئے مختلف ممالک کے ساتھ معاہدے کررہی ہے۔ ای مائیگریٹ پلیٹ فارم کے ذریعے غیر ملکی کمپنیوں اور رجسٹرڈ ایجنٹس کو اکٹھا کر کے افرادی قوت کے موثر حل فراہم کیے جا رہے ہیں۔ گزشتہ 5 سالوں میں اس پورٹل کے ذریعے خلیجی ممالک میں ہزاروں لوگوں کو روزگار ملا ہے۔
وزیر اعظم مودی نے ہفتہ کو کہا کہ ہندوستان اور کویت کے درمیان ثقافت اور تجارت کے ذریعہ بنائے گئے تعلقات آج نئی بلندیوں کو چھو رہے ہیں۔ کویت ہندوستان کا ایک اہم توانائی اور تجارتی شراکت دار ہے۔ کویتی کمپنیاں ہندوستان میں بڑی سرمایہ کاری کر رہی ہیں۔ کویت اور ہندوستان کے شہریوں نے ہمیشہ بحران کے وقت ایک دوسرے کی مدد کی ہے۔ وزیراعظم نے اس بات کا خصوصی ذکر کیا کہ 43 سال بعد کوئی بھارتی وزیراعظم کویت کا دورہ کر رہا ہے، انہوں نے کہا کہ بھارت سے یہاں آنے میں 4 گھنٹے لگتے ہیں لیکن وزیراعظم کو آنے میں 4 دہائیاں لگیں۔
وزیر اعظم نے مقامی ہندوستانی برادری کی تعریف کی اور کہا کہ وہ ان کی کامیابیوں کا جشن منانے آئے ہیں۔ کویتی قیادت بھی ہندوستانیوں کے تعاون کو سراہتی ہے۔ انہوں نے کہا کہ ہندوستان ان چند ممالک میں شامل ہے جنہوں نے آزادی کے بعد کویت کو تسلیم کیا۔ کوویڈ کے دوران، کویت نے ہندوستان کو مائع آکسیجن فراہم کی اور اس دوران ہندوستان نے بھی ویکسین اور میڈیکل ٹیم کویت بھیج کر لڑنے کی ہمت دی۔
اپنے کویت کے دورے کے پہلے پروگرام کے طور پر، وزیر اعظم نریندر مودی نے تقریباً 1500 ہندوستانی شہریوں کی افرادی قوت کے ساتھ کویت کے علاقے مینا عبداللہ میں ایک لیبر کیمپ کا دورہ کیا۔ وزیر اعظم نے ہندوستان کی مختلف ریاستوں سے آئے ہندوستانی کارکنوں کے مختلف طبقوں سے بات چیت کی اور ان کی خیریت دریافت کی۔
وزارت خارجہ کے مطابق، لیبر کیمپ کا دورہ وزیر اعظم کی طرف سے بیرون ملک ہندوستانی مزدوروں کی فلاح و بہبود کو دی جانے والی اہمیت کی علامت ہے۔ پچھلے کچھ سالوں میں، حکومت نے بیرون ملک ہندوستانی کارکنوں کی فلاح و بہبود کے لیے ٹیکنالوجی پر مبنی کئی اقدامات کیے ہیں جیسے کہ ای مائیگریٹ پورٹل، مداد پورٹل اور اُنّت پرواسی بھارتیہ بیمہ یوجنا۔
ہندوستھان سماچار
ہندوستان سماچار / عبدالواحد
