دہرادون، 21 دسمبر (ہ س)۔ نیپال اور چین کی سرحد سے متصل اتراکھنڈ کے پتھورا گڑھ ضلع کے دھارچولا-تواگھاٹ علاقے میں چین کی سرحد کے قریب ایک زبردست لینڈ سلائیڈنگ ہوئی جس کی خوفناک ویڈیو سوشل میڈیا پر وائرل ہو رہی ہے۔ ویڈیو میں واضح طور پر دیکھا جا سکتا ہے کہ کس طرح پہاڑی کا ایک بڑا حصہ تیزی سے ٹوٹ کر پوری سڑک کو بلاک کر دیتا ہے اور گردو غبار کے بادل چاروں طرف پھیل جاتے ہیں۔

یہ لینڈ سلائیڈنگ اس وقت ہوئی جب تواگھاٹ علاقے میں قومی شاہراہ پر سڑک کو چوڑا کرنے کا کام جاری تھا۔ اچانک پہاڑی کا ایک حصہ گر گیا جس سے وہاں کام کرنے والے مزدوروں اور مقامی لوگوں میں خوف وہراس پھیل گیا۔ تاہم راحت کی بات یہ ہے کہ اس واقعہ میں کسی جانی نقصان کی کوئی خبر نہیں ہے۔ مقامی انتظامیہ نے واقعے کی تصدیق کر دی ہے۔

پتھورا گڑھ کے ضلع مجسٹریٹ ونود گری گوسوامی نے کہا کہ تواگھاٹ-دھارچولا سڑک تودے گرنے کی وجہ سے مکمل طور پر بند ہو گئی ہے۔ بارڈر روڈز آرگنائزیشن (بی آر او) اس راستے کو کھولنے کے لیے مسلسل کوششیں کر رہی ہے، لیکن لینڈ سلائیڈنگ کی وجہ سے ہونے والے نقصان کو دیکھتے ہوئے اس کام میں وقت لگ سکتا ہے۔

ایس ڈی ایم منجیت نیگی اور ایس پی ریکھا یادو نے بھی اس ویڈیو کی تصدیق کرتے ہوئے کہا کہ لوگ متبادل راستوں کا استعمال کریں۔ انتظامیہ امدادی کاموں اور سڑکوں کو کھولنے کے لیے مسلسل کوششیں کر رہی ہے۔

وزیر اعلیٰ دھامی نے افسران کو ہدایات دیتے ہوئے کہا کہ پتھورا گڑھ ضلع میں تواگھاٹ-دھارچولا قومی شاہراہ پر لینڈ سلائیڈ کی وجہ سے ٹریفک متاثر ہونے کی اطلاع ملی ہے۔ اچھی خبر یہ ہے کہ کوئی جانی نقصان نہیں ہوا۔ ملبہ ہٹانے کے لیے فوری اقدامات کرنے کے ساتھ ساتھ ضلع انتظامیہ اور متعلقہ حکام کو سڑک کو جلد از جلد کھولنے کی ہدایات دی گئی ہیں۔

ہندوستھان سماچار

ہندوستان سماچار / محمد شہزاد