ریاست سمیت ملک میں ای وی ایم کے خلاف لڑیں گے : شرد پوارممبئی، 26 نومبر (ہ س)۔ نیشنلسٹ کانگریس پارٹی (ایس پی) کے صدر شرد پوار نے منگل کو پارٹی عہدیداروں سے ریاست سمیت ملک میں ای وی ایم کے خلاف لڑائی تیز کرنے کو کہا۔ انہوں نے پارٹی قائدین کو یہ بھی ہدایت دی ہے کہ وہ اس لڑائی کو قانونی طور پر لڑنے کے لیے ریاستی اور ملکی سطح پر وکلاء کی ٹیم بنائیں۔ اسی سلسلے میں آج شیوسینا (یو بی ٹی) کے صدر ادھو ٹھاکرے نے بھی انتخابات میں شکست پانے والے امیدواروں کو ہر اسمبلی حلقہ میں شکایت کرنے کا حکم دیا ہے۔ مہاراشٹر میں انتخابی نتائج کے اعلان کے بعد، منگل کو شرد پوار نے ممبئی کے وائی بی پرتشٹھان میں اپنی پارٹی کے رہنماؤں اور ہارنے والے امیدواروں کی میٹنگ بلائی تھی۔ اس میٹنگ میں تقریباً تمام ہارے ہوئے امیدواروں نے ای وی ایم پر شک ظاہر کیا۔ ای وی ایم میں الیکشن کے بعد ووٹوں کی تعداد اور گنتی کے بعد ووٹوں کی تعداد میں بہت فرق ہے۔

شکست پانے والے امیدوار پرشانت جگتاپ نے کہا کہ حکمران پارٹیوں کے لیے ای وی ایم پہلے سے ہی محفوظ ہیں۔ اسی طرح الیکشن جیتنے والے جتیندر اوہاڑ نے کہا کہ انہوں نے ایک لاکھ سے زیادہ ووٹوں کے فرق سے الیکشن جیتا ہے۔ پھر بھی وہ ای وی ایم کے بارے میں متفق نہیں ہیں۔ ای وی ایم سیٹنگ چھوٹی ریاستوں میں نہیں کی جاتی ہے، جب کہ بڑی ریاستوں میں ای وی ایم سیٹنگ کی جاتی ہے۔ اس کے بعد یہ دلیل دی جاتی ہے کہ وہاں ای وی ایم کی وجہ سے اپوزیشن کی جیت ہوئی ہے جبکہ یہ سب ایک بڑا ای وی ایم گھوٹالہ ہے۔

شیوسینا یو بی ٹی کے صدر ادھو ٹھاکرے نے بھی آج ممبئی میں شیوسینا کے عہدیداروں اور ہارنے والے امیدواروں کی میٹنگ بلائی تھی۔ اس میٹنگ میں شکست پانے والے امیدواروں نے ادھو ٹھاکرے سے ای وی ایم میں سیٹنگ کرنے کی شکایت کی ۔ ہارنے والے امیدوار سدھاکر بھیکا بڈگوجر نے کہا کہ انہوں نے ای وی ایم کے تعلق سے ناسک ڈسٹرکٹ الیکشن ریٹرننگ آفیسر کے پاس شکایت درج کرائی ہے۔ ادھو ٹھاکرے نے کہا کہ ہر کسی کو اپنے علاقوں میں ای وی ایم اور وی وی پی اے ٹی کی تصدیق کا مطالبہ کرنا چاہئے۔

اسی طرح پیر کو مہاراشٹر نو نرمان سینا کے صدر راج ٹھاکرے نے اپنی پارٹی کے شکست خوردہ امیدواروں کی میٹنگ بلائی تھی۔ اس میٹنگ میں بھی ای وی ایم پر شک کا اظہار کیا گیا۔

مہاراشٹر پردیش کانگریس کے صدر نانا پٹولے نے کہا کہ ان کے سرکردہ لیڈر ای وی ایم کی خرابی کی وجہ سے الیکشن ہار گئے۔ جتیندر اوہاڑ کے بیان کو دہراتے ہوئے نانا پٹولے نے کہا کہ ای وی ایم میں ووٹ ڈالنے کے بعد یہ معلوم نہیں ہوتا کہ ووٹ کس کو ڈالا گیا ہے۔ اس معاملے میں عدالت عوامی جذبات کا احترام نہیں کر رہی ہے۔ اس لیے ای وی ایم مخالف لڑائی عدالتوں کے ساتھ ساتھ سڑکوں پر بھی لڑی جائے گی۔

ہندوستھان سماچار

--------------------

ہندوستان سماچار / نثار احمد خان