پورٹ لوئس، 12 نومبر (ہ س)۔ لیبر پارٹی کے رہنما اور سابق وزیر اعظم نوین رام علام نے ماریشس کے پارلیمانی انتخابات میں تاریخی کامیابی حاصل کی ہے۔ 10 نومبر کو ہونے والے انتخابات میں موجودہ وزیر اعظم پروِند جگناوتھ کی پارٹی سوشلسٹ موومنٹ اپنا کھاتہ بھی نہیں کھول سکی۔ ہندوستان کے وزیر اعظم نریندر مودی نے نوین رام غلام کو ان کی جیت پر مبارکباد دی ہے۔
یہ معلومات ماریشس کی نیوز ویب سائٹ لے موریسین کی خبر میں دی گئی ہے۔ اس الیکشن میں رام غلام کی لیبر پارٹی کے اتحاد ’الائنس ڈو چینج منٹ‘ نے تمام 62 سیٹیں جیت لی ہیں۔ جگناتھ کے اتحاد لیلیپ کو ایک بھی سیٹ نہیں ملی ہے۔ وزیر اعظم جگناتھ نے ہار قبول کرتے ہوئے کہا کہ انہوں نے ملک کو آگے لے جانے کے لیے جو کچھ بھی ہو سکتا تھا، وہ کیا لیکن ووٹروں نے دوسری پارٹی کو جیت دلانے کا فیصلہ کیا۔ اس کے لیے تمام ووٹرز مبارکباد کے مستحق ہیں۔
قابل ذکر ہے کہ نوین رام غلام 1995 سے 2000 اور 2005 سے 2015 تک وزیر اعظم رہے۔ جگناتھ اور رام غلام دونوں ایسے خاندانوں سے تعلق رکھتے ہیں جنہوں نے 1968 میں برطانیہ سے آزادی کے بعد ماریشس کی سیاست پر غلبہ حاصل کیا۔ 77 سالہ رام غلام شیو ساگر رام غلام کے بیٹے ہیں جنہوں نے ماریشس کو آزادی دلائی۔ رام غلام تیسری بار وزیر اعظم بنیں گے۔ ماریشس کے ساتھ ہندوستان کے مضبوط تعلقات ہیں۔ اس کی اہم وجہ ہندوستانی نژاد لوگوں کی آبادی کا غلبہ ہے۔ اس وقت 12 لاکھ کی آبادی میں سے 70 فیصد ہندوستانی نژاد ہیں۔
ہندوستان کے وزیر اعظم نریندر مودی نے ماریشس کے نومنتخب وزیر اعظم ڈاکٹر نوین رام غلام کو ان کی تاریخی انتخابی کامیابی پر مبارکباد دی۔ وزیر اعظم مودی نے پیر کو ایکس پر لکھا، ”میرے دوست رام غلام کے ساتھ گرمجوشی سے بات چیت ہوئی، انہیں ان کی تاریخی انتخابی جیت پر مبارکباد دی۔ میں نے انہیں ماریشس کی قیادت کرنے میں بڑی کامیابی کی خواہش ظاہر کی اور انہیں ہندوستان کے دورے کی دعوت دی۔ میں اپنی خصوصی اور منفرد شراکت داری کو مضبوط بنانے کے لیے مل کر کام کرنے کا منتظر ہوں۔“
ہندوستھان سماچار
ہندوستان سماچار / محمد شہزاد
