سرکاری بھرتی امتحانات میں پیپر لیک اور گڑبڑی روکنے کے لیے مہاراشٹر حکومت کی ہائی لیول کمیٹی قائم

ممبئی، 5 ستمبر (ہ س)۔ مہاراشٹر حکومت نے سرکاری بھرتی امتحانات میں پیپر لیک، نقل اور دیگر بے ضابطگیوں کو روکنے اور امتحانی نظام کو مزید بہتر بنانے کے لیے ایک ہائی لیول کمیٹی قائم کرنے کا فیصلہ کیا ہے۔ حکومت کا مقصد بھرتی امتحانات کے موجودہ نظام کا تفصیلی جائزہ لے کر اسے زیادہ شفاف، محفوظ، قابل اعتماد اور امیدواروں کے لیے بہتر بنانا ہے۔

اس سلسلے میں 12 اگست 2026 کو وزیر اعلیٰ کی صدارت میں ہونے والی میٹنگ میں تفصیلی بات چیت کی گئی تھی۔ اس کے بعد جنرل ایڈمنسٹریشن ڈپارٹمنٹ نے 04 ستمبر کو سرکاری فیصلہ جاری کرتے ہوئے اعلی سطحی کمیٹی تشکیل دی۔ یہ کمیٹی جنرل ایڈمنسٹریشن ڈپارٹمنٹ سروسز کی ایڈیشنل چیف سیکریٹری وی رادھا کی صدارت میں قائم کی گئی ہے۔ کمیٹی میں پولیس ڈائریکٹر جنرل سدانند داتے، محکمہ اطلاعات کے سیکریٹری ویریندر سنگھ، سیکریٹری این راماسوامی، ڈویژنل کمشنر پروین گیدام، ریٹائرڈ ایئر مارشل اجیت شنکر راؤ بھوسلے اور آئی آئی ٹی ممبئی کے پروفیسر شیام پرساد کرگڑے شامل ہیں۔

ہائی لیول کمیٹی ریاستی حکومت کے مختلف محکموں، اتھارٹیز اور بھرتی امتحانات منعقد کرنے والے اداروں کی جانب سے اختیار کیے جانے والے موجودہ امتحانی نظام کا تفصیلی مطالعہ کرے گی۔ اس دوران سوالیہ پرچہ تیار کرنے کے طریقہ کار، امتحان کے انعقاد، ماڈریشن، ایک سے زیادہ سوالیہ پرچوں کے سیٹ تیار کرنے، پرچوں کو پرنٹ شدہ یا ڈیجیٹل شکل میں تقسیم کرنے سمیت مختلف مراحل کا جائزہ لیا جائے گا۔

کمیٹی امتحانی پرچوں کی ترسیل اور منتقلی کے نظام کا بھی جائزہ لے گی۔ اس کے علاوہ امتحان کے دوران امیدواروں کے جوابات ریکارڈ کرنے، جوابات کی جانچ اور تشخیص، امتحانی نتائج جاری کرنے اور پورے عمل میں موجود ممکنہ خامیوں کی نشاندہی کی جائے گی۔ ان خامیوں کو دور کرنے کے لیے ضروری حفاظتی اقدامات اور اصلاحات سے متعلق تجاویز بھی حکومت کو دی جائیں گی۔

کمیٹی ریاست کے ہر ریونیو ڈویژن کا دورہ کرے گی اور طلبہ و امیدواروں کے ساتھ ساتھ تعلیمی اداروں کے نمائندوں سے بالمشافہ یا آن لائن بات چیت کرے گی۔ ان ملاقاتوں کے دوران حاصل ہونے والی تجاویز اور فیڈبیک کو بھی کمیٹی اپنی سفارشات میں شامل کرے گی۔ کمیٹی دوسرے ریاستوں میں بھرتی امتحانات کے لیے اختیار کیے گئے مؤثر اور بہتر طریقوں کا بھی مطالعہ کرے گی۔ ضرورت کے مطابق بیرون ملک نافذ امتحانی نظاموں اور ان کے طریقہ کار کا حوالہ بھی لیا جائے گا تاکہ مہاراشٹر کے بھرتی امتحانی نظام میں قابل عمل اصلاحات لائی جا سکیں۔

حکومت کی جانب سے تشکیل دی گئی کمیٹی بھرتی امتحانات میں پیپر لیک، گڑبڑی، فرضی امیدواروں کے امتحان دینے اور ٹیکنالوجی کے غلط استعمال جیسے مسائل کو روکنے کے لیے موجودہ انتظامات کا بھی جائزہ لے گی۔ اس کے ساتھ شکایات کے ازالے کے نظام اور امیدواروں کے ساتھ رابطے کے طریقہ کار کو مزید مؤثر بنانے پر توجہ دی جائے گی، تاکہ بھرتی کے پورے عمل میں امیدواروں کا اعتماد مضبوط کیا جا سکے۔ کمیٹی اپنی تمام جائزوں، مشاہدات، تجاویز اور موصول ہونے والے فیڈبیک کی بنیاد پر حکومت کو ایک مکمل حتمی رپورٹ پیش کرے گی۔ اس رپورٹ کی بنیاد پر ریاست کے سرکاری بھرتی امتحانات کے نظام میں ضروری اصلاحات کے لیے مزید اقدامات کیے جائیں گے۔

ہندوستھان سماچار

--------------------

ہندوستان سماچار / جاوید این اے