نئی دہلی، 4 ستمبر (ہ س)۔

نیپال میں پیش آنے والی تباہی کے بعد بھارت راحت اور بچاو کے کاموں میں مسلسل تعاون کر رہا ہے۔ اب بھی 275 بھارتی شہری لاپتہ ہیں۔ ان میں سے 49 چین سے لاپتہ ہیں۔ بھارت نے نیپال کی حکومت اور عوام کے ساتھ یکجہتی کا اظہار کرتے ہوئے تعمیر نو اور بحالی کی کوششوں میں بھی تعاون جاری رکھنے کے عزم کا اعادہ کیا ہے۔

وزارت خارجہ کے ترجمان رندھیر جیسوال نے جمعہ کو ہفتہ وار پریس کانفرنس میں بتایا کہ نیپال میں اب تک 166 بھارتی شہریوں کو بحفاظت بچایا جا چکا ہے۔ وہیں چین سے 1,907 بھارتی شہری بحفاظت نیپال پہنچ چکے ہیں۔ تبت میں فی الحال کوئی بھارتی مسافر پھنسا ہوا نہیں ہے۔

بھارت نے راحت اور بچاو کے کاموں کے لیے 54 ماہرین اور اہلکاروں کو نیپال بھیجا ہے۔ ان میں 30 سرنگوں میں بچاو¿ کے ماہرین، 19 فارنسک ماہرین اور پانچ رکنی طبی ٹیم شامل ہے۔ بھارتی بچاو اور فارنسک ٹیمیں نیپال میں مقامی حکام کے ساتھ مل کر کام کر رہی ہیں۔

ترجمان نے بتایا کہ بھارت نے نیپال کے راحت اور بچاو آپریشن کے لیے اب تک تقریباً 95 ٹن امدادی سامان اور سات طیارے بھیجے ہیں۔ کل دو بھارتی طیارے کاٹھمنڈو پہنچے، جن میں 21 ٹن امدادی سامان موجود تھا۔ نیپال کی ضرورت کے مطابق آنے والے دنوں میں مزید ابتدائی طبی امدادی کٹس اور دیگر ضروری سامان بھیجا جائے گا۔

موسمیاتی تبدیلی سے متعلق ایک سوال کے جواب میں جیسوال نے کہا کہ بھارت اسے مشترکہ چیلنج سمجھتا ہے۔ انہوں نے کہا کہ اس چیلنج سے نمٹنے کے لیے کارروائی مشترکہ لیکن مختلف ذمہ داریوں اور متعلقہ صلاحیتوں کے اصول پر مبنی ہونی چاہیے۔ ان کے مطابق تاریخی طور پر زیادہ اخراج کے ذمہ دار ترقی یافتہ ممالک کو اخراج میں کمی کے ساتھ ساتھ ترقی پذیر ممالک کو مالی وسائل اور ٹیکنالوجی فراہم کرنے میں قیادت کرنی چاہیے۔

ہندوستھان سماچار

ہندوستان سماچار / عطاءاللہ