چترا، 4 ستمبر (ہ س)۔ جھارکھنڈ کے چترا صدر تھانہ علاقے کے کڑگو پٹیر میں واقع گھورنا ڈیہہ ندی میں پکنک منانے گئے تین کم عمر لڑکوں میں سے دو کی مشتبہ حالات میں موت ہو گئی، جبکہ تیسرے لڑکے کا ابھی تک کوئی سراغ نہیں مل سکا ہے۔

برآمد کیے گئے دونوں لاشوں کی شناخت چور محلہ کے رہنے والے انش پرکاش اور ڈھنگر ٹولی کے رہائشی پرنس کمار کے طور پر ہوئی ہے۔ دونوں کی عمریں تقریباً 12 سے 14 سال بتائی جا رہی ہیں۔مقامی لوگوں کے مطابق تینوں لڑکے جمعہ کو ندی کے قریب پکنک منانے پہنچے تھے۔ نہانے سے پہلے انہوں نے موقع پر پاستا بنا کر کھایا اور اس کے بعد ندی میں نہانے چلے گئے۔ کچھ دیر بعد سڑک اور ندی کے کنارے دو لڑکوں کی لاشیں ملیں۔اطلاع ملنے پر صدر تھانہ انچارج انل اوراؤں کی قیادت میں پولیس موقع پر پہنچی اور لاشوں کو قبضے میں لے کر شناخت کا عمل شروع کیا۔ جائے وقوعہ سے تین جوڑی چپل، دو اسکول بیگ، ماچس، مرہم، ڈیٹول، ڈسپوزیبل پلیٹیں، کٹوریاں اور پانی کی بوتل سمیت متعدد اشیا برآمد ہوئی ہیں۔

تیسرے لڑکے کو کسی نامعلوم شخص کے ذریعے اسپتال لے جانے کی بات سامنے آئی ہے، تاہم اسپتال میں اس کے داخل ہونے کی تصدیق نہیں ہو سکی۔ پولیس آس پاس کے علاقوں میں اس کی تلاش کر رہی ہے۔دو بچوں کی لاشیں ملنے کے بعد علاقے میں سنسنی پھیل گئی ہے۔ پولیس نے معاملے کی تحقیقات شروع کر دی ہیں۔ دونوں کی موت کی اصل وجہ پوسٹ مارٹم رپورٹ آنے کے بعد ہی واضح ہو سکے گی۔

ہندوستھان سماچار

ہندوستان سماچار / Mohammad Khan