نئی دہلی، 24 ستمبر (ہ س):۔

پنجاب میں بی جے پی کی جانب سے چلائی جا رہی ’منشیات سے پاک پنجاب‘ مہم کا اختتام 30 ستمبر کو جالندھر میں ہوگا۔ اس موقع پر مرکزی وزیر داخلہ امت شاہ ایک بڑے جلسہ عام سے خطاب کریں گے۔ مہم کے تحت ریاست کے مختلف حصوں سے نکالی جانے والی چار منشیات مخالف یاترائیں بھی اسی روز جالندھر پہنچ کر ایک ساتھ اختتام پذیر ہوں گی۔

بی جے پی ذرائع کے مطابق 30 ستمبر کو چاروں یاتراو¿ں کے جالندھر پہنچنے کے بعد اختتامی پروگرام منعقد کیا جائے گا۔ اس کے بعد امت شاہ بڑے جلسے سے خطاب کریں گے۔ جالندھر-پھگواڑہ ہائی وے کے قریب جلسے کے لیے مقام طے کر لیا گیا ہے اور پارٹی کی مقامی یونٹ نے تیاریاں بھی شروع کر دی ہیں۔

بی جے پی کے قومی صدر نتن نوین نے 18 ستمبر کو پٹھان کوٹ کے مادھوپور سے چار مختلف راستوں پر ’منشیات سے پاک پنجاب یاتراو¿ں‘ کا آغاز کیا تھا۔ یہ یاترائیں مجموعی طور پر 13 دن تک جاری رہیں گی۔ ان یاتراو¿ں کو ریاست کی تمام 117 اسمبلی نشستوں تک پہنچانے کا منصوبہ ہے۔ چاروں یاترائیں مجموعی طور پر تقریباً 4,000 کلومیٹر کا فاصلہ طے کر رہی ہیں۔

پہلی یاترا پٹھان کوٹ کے مادھوپور میں واقع ایکتا استھل سے شروع ہوئی تھی، جبکہ دیگر یاتراو¿ں کا آغاز فتح گڑھ صاحب، فاضلکا اور تلوَنڈی سابو سے کیا گیا۔ مہم کا مقصد منشیات کے خلاف بیداری پیدا کرنا اور اس مسئلے پر وسیع عوامی شمولیت کو فروغ دینا بتایا گیا ہے۔

اس پروگرام کو مہم کے آخری مرحلے کے طور پر دیکھا جا رہا ہے۔ دوسری جانب 2027 کے پنجاب اسمبلی انتخابات سے قبل منشیات کا مسئلہ ریاست کی سیاست میں ایک اہم موضوع بنا ہوا ہے۔ بی جے پی نے اس مہم کو منشیات کے خلاف سماجی بیداری سے جوڑتے ہوئے ریاست گیر سطح پر چلایا ہے۔ پارٹی رہنماو¿ں کا کہنا ہے کہ منشیات کے مسئلے سے نمٹنے کے لیے صرف قانون نافذ کرنے کی کارروائی کافی نہیں، بلکہ بیداری، علاج، بحالی اور نوجوانوں کے لیے تعلیم و روزگار کے مواقع پر بھی توجہ دینے کی ضرورت ہے۔

ہندوستھان سماچار

ہندوستان سماچار / عطاءاللہ