واشنگٹن، 23 ستمبر(ہ س)۔ امریکی محکمہ دفاع (پینٹاگون) نے ایران کے خلاف جاری جنگ کے دوران ایک اور امریکی فوجی کی ہلاکت کی تصدیق کردی ہے، جس کے بعد پینٹاگون کے سرکاری اعداد و شمار کے مطابق ہلاک ہونے والے امریکی فوجیوں کی مجموعی تعداد 19 ہوگئی ہے۔ تازہ ہلاکت کو پینٹاگون کے ریکارڈ میں غیر جنگی نوعیت کی ہلاکت قرار دیا گیا ہے۔یہ پیش رفت ایسے وقت میں ہوئی ہے جب امریکی فوجیوں کی ہلاکتوں کے سرکاری اعداد و شمار پر سوالات اٹھ رہے ہیں۔ واشنگٹن پوسٹ نے 18 ستمبر کو امریکی حکام کے حوالے سے رپورٹ کیا تھا کہ ایران جنگ کے دوران کم از کم 22 امریکی فوجی ہلاک ہوچکے ہیں، جبکہ ایک اور اہلکار نے یہ تعداد 23 بتائی تھی۔ تاہم ان اضافی ہلاکتوں کی مکمل تفصیلات عوامی طور پر واضح نہیں کی گئی ہیں۔

رپورٹ کے مطابق پینٹاگون کے عوامی ڈیٹا بیس میں اس وقت 19 ہلاکتیں درج ہیں، جبکہ امریکی حکام کے مطابق مشرق وسطیٰ میں جاری جنگ کے دوران کچھ دیگر امریکی فوجیوں کی ہلاکتیں بھی ہوئی ہیں جو سرکاری فہرست میں شامل نہیں کی گئیں۔ امریکی وزیر دفاع پیٹ ہیگستھ نے اس سے قبل پینٹاگون کی جانب سے ہلاکتوں کو کم ظاہر کیے جانے کی رپورٹ کو مسترد کرتے ہوئے اسے غلط قرار دیا تھا۔اس سے قبل امریکی محکمہ دفاع کے انسپکٹر جنرل کی رپورٹ میں بتایا گیا تھا کہ جنگ کے ابتدائی چار ماہ کے دوران امریکی فوجیوں کی ہلاکتوں کے علاوہ ایران کے حملوں میں امریکی فوجی تنصیبات اور جنگی سازوسامان کو بھی نقصان پہنچا۔ واشنگٹن پوسٹ کے مطابق امریکی سینٹرل کمانڈ نے ستمبر کے اوائل تک ایران جنگ کی لاگت تقریباً 43.6 ارب ڈالر بتائی تھی، جس میں تقریباً 28 ارب ڈالر کے استعمال شدہ اسلحے اور گولہ بارود کے اخراجات شامل تھے۔

دریں اثنا، ایران اور امریکا کے درمیان جنگ کے خاتمے کے لیے سفارتی رابطے بھی جاری ہیں۔ امریکی صدر ڈونلڈ ٹرمپ نے 22 ستمبر کو اقوام متحدہ کی جنرل اسمبلی سے خطاب کے بعد کہا کہ ایران کے ساتھ بات چیت جاری ہے اور انہوں نے کسی معاہدے تک پہنچنے کی امید ظاہر کی۔ تاہم انہوں نے ایران کے جوہری پروگرام کے حوالے سے امریکی موقف برقرار رکھا۔امریکی فوجیوں کی ہلاکتوں کے سرکاری اور غیر سرکاری اعداد و شمار میں فرق نے ایران جنگ میں امریکی نقصانات کے درست حجم سے متعلق بحث کو مزید نمایاں کردیا ہے۔

ہندوستھان سماچار

ہندوستان سماچار / Mohammad Khan