ممبئی ، 20 ستمبر (ہ س)۔ ممبئی میں کانجورمارگ پولیس اسٹیشن کے ایکسٹرنمنٹ ڈپارٹمنٹ کے قریب زیر تعمیر عمارت سے 200 کلو وزنی لوہے کا بیم 13 ویں منزل سے گرنے کے واقعے میں پولیس نے کے اے ایم ایس ریئلٹر کے سائٹ کنٹریکٹر اور سیفٹی عملے کے خلاف مقدمہ درج کیا ہے۔ بیم دفتر کے داخلی راستے کے قریب گرا، تاہم خوش قسمتی سے اس وقت کوئی شخص زخمی نہیں ہوا۔

پولیس کے مطابق کانجورمارگ پولیس اسٹیشن کے ایکسٹرنمنٹ ڈپارٹمنٹ کا دفتر کے اے ایم ایس ریئلٹر کی زیر تعمیر عمارت کے بالکل قریب واقع ہے۔ 18 ستمبر کو 56 سالہ اسسٹنٹ پولیس سب انسپکٹر وشواس دشرتھ دیسائی ڈیوٹی پر تعینات تھے۔ دوپہر کے وقت وہ دفتر کے اندر کمپیوٹر پر کام کر رہے تھے کہ اچانک ایک زور دار آواز سنائی دی۔ آواز سن کر وہ فوراً باہر آئے تو دفتر کے داخلی راستے کے عین سامنے تقریباً 200 کلو وزنی لوہے کا بڑا بیم پڑا ہوا تھا۔

پولیس کے مطابق بیم ایک درخت اور دفتر کی ٹین کی چھت پر جا گرا تھا۔ تعمیراتی مقام پر کام کرنے والے مزدوروں نے پولیس کو بتایا کہ یہ لوہے کا بیم اسی زیر تعمیر عمارت سے گرا تھا۔ بیم گرنے سے دفتر کی ٹین کی چھت کو نقصان پہنچا، تاہم کسی شخص کو چوٹ نہیں آئی۔ پولیس نے بتایا کہ تعمیراتی مقام سے اس سے پہلے بھی دفتر کے قریب چھوٹے پتھر، بجری اور لوہے کی سلاخیں گرنے کے واقعات سامنے آئے تھے۔ پولیس کی جانب سے مبینہ طور پر کنٹریکٹر کو اس مسئلے کے بارے میں خبردار بھی کیا گیا تھا۔ اس کے باوجود تعمیراتی مقام پر مناسب حفاظتی انتظامات نہ کیے جانے کا الزام ہے۔

واقعے کے بعد پولیس نے کے اے ایم ایس ریئلٹر کے سائٹ کنٹریکٹر متیش جین، سائٹ انجینئر دھن راج رام چندر جگتاپ اور سیفٹی سپروائزرز وکرم اور سہیل مرزا کے خلاف مقدمہ درج کیا ہے۔ ان پر تعمیراتی مقام پر مناسب حفاظتی احتیاطی تدابیر اختیار نہ کرنے اور دوسروں کی جان و ذاتی سلامتی کو خطرے میں ڈالنے کا الزام عائد کیا گیا ہے۔ پولیس نے بھارتیہ نیائے سنہتا کے متعلقہ دفعات کے تحت مقدمہ درج کیا ہے۔ واقعے کی مزید تفتیش جاری ہے۔ہندوستھان سماچار

ہندوستان سماچار / جاوید این اے