ناگویا (جاپان)، 20 ستمبر (ہ س)۔ بھارتی نشانے باز ایلایونیل والاریون نے ایشیائی کھیل 2026 میں خواتین کی 10 میٹر ایئر رائفل انفرادی مقابلے میں چاندی کا تمغہ جیت لیا۔ فائنل میں ایلایونیل نے 252.4 پوائنٹس حاصل کیے اور طویل عرصے تک طلائی تمغے کی دوڑ میں سب سے آگے رہیں، تاہم آخری مرحلے میں میزبان جاپان کی ہیناتا تائچی نے 253 پوائنٹس کے ساتھ سونے کا تمغہ جیت لیا۔

ہیناتا تائچی نے 253 پوائنٹس کے ساتھ ایشیائی کھیلوں کا نیا ریکارڈ بھی قائم کیا۔ ایلایونیل اور ہیناتا کے درمیان طلائی تمغے کے لیے مقابلہ انتہائی سنسنی خیز رہا اور دونوں کے اسکور میں صرف 0.6 پوائنٹس کا فرق رہا۔ جنوبی کوریا کی ہیو جن بان نے 230.4 پوائنٹس کے ساتھ کانسی کا تمغہ حاصل کیا۔فائنل میں ایلایونیل نے ابتدا ہی سے شاندار نشانے بازی کا مظاہرہ کیا اور مسلسل درست نشانے لگاتے ہوئے برتری قائم رکھی۔ مقابلہ آخری مرحلے میں پہنچنے کے ساتھ دباؤ بڑھا، تاہم جاپانی کھلاڑی ہیناتا نے آخری لمحات میں بہتر کارکردگی کا مظاہرہ کرتے ہوئے برتری حاصل کرلی اور 253 پوائنٹس کے ساتھ پہلی پوزیشن حاصل کی۔ ایلایونیل 252.4 پوائنٹس کے ساتھ دوسرے نمبر پر رہیں۔

بھارت کی سونم مسکر خواتین کی 10 میٹر ایئر رائفل انفرادی مقابلے میں چھٹے نمبر پر رہیں۔ انہوں نے فائنل میں 167.0 پوائنٹس حاصل کیے۔ کوالیفکیشن میں تیسری پوزیشن حاصل کرنے کے بعد ان سے بھی تمغے کی امید تھی، لیکن وہ فائنل میں ٹاپ تین میں جگہ نہیں بنا سکیں۔یہ ایشیائی کھیل 2026 میں بھارت کا دوسرا تمغہ ہے۔ ایلایونیل کا بھی ان کھیلوں میں یہ دوسرا تمغہ ہے۔ اس سے قبل انہوں نے اتوار کو خواتین کی 10 میٹر ایئر رائفل ٹیم مقابلے میں بھی چاندی کا تمغہ جیتا تھا۔ اس مقابلے میں ایلایونیل نے سونم مسکر اور ودھرسا ونود کے ساتھ مل کر بھارت کو تمغہ دلایا۔

ہندوستھان سماچار

ہندوستان سماچار / Mohammad Khan