نئی دہلی، 2 ستمبر (ہ س)۔ سپریم کورٹ نے ریزرویشن میں کریمی لیئر کے معاملے میں مرکزی حکومت کو کوئی راحت دینے سے انکار کر دیا ہے۔ عدالت نے اس معاملے میں اپنے 11 مارچ کے سابقہ فیصلے پر روک لگانے سے بھی انکار کر دیا۔ جسٹس پی ایس نرسمہا کی سربراہی والی بنچ نے تمام فریقوں کو 17 ستمبر تک اپنا جواب داخل کرنے کی ہدایت دی ہے۔
مرکزی حکومت نے کریمی لیئر کے معاملے میں سپریم کورٹ سے مطالبہ کیا ہے کہ 11 مارچ کے فیصلے کو سابقہ تاریخ سے نافذ نہ کیا جائے اور اس پر عمل درآمد کے لیے دو سال کا وقت دیا جائے۔ مرکز کا کہنا ہے کہ اس فیصلے کا اثر سرکاری ملازمتوں، سروس اور کیڈر الاٹمنٹ، سینیارٹی، اعلیٰ تعلیمی اداروں میں داخلوں اور 18 ریاستوں و مرکز کے زیر انتظام علاقوں پر پڑ سکتا ہے۔
مرکزی حکومت نے سپریم کورٹ میں دائر اپنی درخواست میں کہا ہے کہ 11 مارچ کے فیصلے کی وضاحت کی جائے، کیونکہ اس پر عمل درآمد کے نتیجے میں بڑے پیمانے پر اثرات مرتب ہو سکتے ہیں۔ حکومت کے مطابق اس کے تحت ایسے امیدواروں کو بھی نان کریمی لیئر کے زمرے میں شامل کیا جا سکتا ہے جن کے والدین کی آمدنی زیادہ ہے۔
مرکز نے عدالت سے مطالبہ کیا ہے کہ فیصلے پر عمل درآمد کے لیے دو سال کا وقت دیا جائے، تاکہ اس دوران متعلقہ عہدوں اور کیڈروں کی برابری طے کرنے کے لیے ضروری عمل مکمل کیا جا سکے۔
ہندوستھان سماچار
ہندوستان سماچار / Mohammad Khan
