نئی دہلی، 2 ستمبر (ہ س)۔ انفورسمنٹ ڈائریکٹوریٹ (ای ڈی) کی ممبئی زونل ٹیم نے غیر قانونی سٹہ بازی پلیٹ فارم پیری میچ اور دیگر سے جڑے ایک معاملے میں ملک بھر کے 12 مقامات پر چھاپے مارے۔ ای ڈی نے یہ کارروائی انسدادِ منی لانڈرنگ ایکٹ (پی ایم ایل اے) 2002 کی دفعہ 17 کے تحت کی ہے۔ای ڈی کے مطابق بدھ کو کی گئی کارروائی کے دوران مہاراشٹر میں پانچ، راجستھان میں دو، گجرات میں ایک اور دہلی-این سی آر میں چار مقامات کی تلاشی لی گئی۔

تلاشی کے دائرے میں ایسی ادائیگی کرنے والی کمپنیوں کے دفاتر بھی شامل ہیں، جنہوں نے کیش مینجمنٹ سسٹم کے ایجنٹوں کے ذریعے سٹہ بازی سے حاصل رقم کو نقد میں تبدیل کیا۔ اس کے علاوہ ایسے چارٹرڈ اکاؤنٹنٹس اور کمپنی سیکریٹریز سے متعلق مقامات کی بھی تلاشی لی گئی، جن پر مبینہ طور پر غیر قانونی طور پر رقم بیرون ملک منتقل کرنے اور فرضی براہِ راست غیر ملکی سرمایہ کاری کے ذریعے رقم ملک سے باہر بھیجنے میں مدد کرنے کا الزام ہے۔ای ڈی کے مطابق پیری میچ کے لیے رقم وصول کرنے اور ادائیگی کا عمل سنبھالنے والے ادائیگی گیٹ ویز بھی تلاشی کے دائرے میں ہیں۔ ایجنسی سٹہ بازی سے حاصل ہونے والی رقم کے بہاؤ اور اسے مختلف ذرائع سے منتقل کیے جانے کی تحقیقات کر رہی ہے۔تلاشی مہم کے دوران ای ڈی کا مقصد مبینہ غیر قانونی سٹہ بازی سے حاصل رقم کے لین دین، اسے نقد میں تبدیل کرنے، بیرون ملک بھیجنے اور فرضی سرمایہ کاری کے ذریعے استعمال کرنے سے متعلق شواہد اکٹھے کرنا ہے۔ معاملے میں مزید تحقیقات جاری ہیں۔ہندوستھان سماچار

ہندوستان سماچار / Mohammad Khan