مرادآباد، 2 ستمبر (ہ س)۔ اتر پردیش میں مرادآباد-ہریدوار ریاستی شاہراہ پر منگل کی دیر رات ہریدوار سے واپس آ رہے نیپالی تیرتھ یاتریوں کی ایک نجی بس روڈویز بس سے ٹکرا گئی۔ اس حادثے میں نیپال کے 35 سے زائد یاتری زخمی ہو گئے، جن میں بس ڈرائیور سمیت 10 کی حالت تشویشناک بنی ہوئی ہے۔ پولیس نے تمام زخمیوں کو اسپتال پہنچایا۔

مرادآباد شہر کے تھانہ کانٹھ علاقے کے تحت گڑھی گاؤں کے اڈے کے قریب یہ بھیانک حادثہ پیش آیا۔ موصولہ اطلاع کے مطابق، نیپالی یاتریوں سے بھری نجی بس ہریدوار میں درشن کے بعد واپس لوٹ رہی تھی۔ اسی دوران آگے چل رہی مرادآباد ڈپو کی روڈویز بس میں پیچھے سے زوردار ٹکر مار دی۔ ٹکر اتنی شدید تھی کہ یاتریوں کی بس بے قابو ہو کر سڑک کنارے بنی ایک گھر میں جا گھسی۔ حادثے میں دونوں بسیں مکمل طور پر تباہ ہو گئی ہیں۔ حادثے کے بعد مسافروں میں چیخ و پکار مچ گئی۔ اطلاع ملتے ہی پولیس کی ٹیم ایمبولینس اور پولیس گاڑیوں کے ساتھ موقع پر پہنچی اور امدادی کارروائی شروع کی۔

پولیس سپرنٹنڈنٹ (دیہات) کنور آکاش سنگھ نے بتایا کہ تمام زخمی یاتریوں کو علاج کے لیے کمیونٹی ہیلتھ سینٹر (سی ایچ سی) کانٹھ لے جایا گیا۔ وہاں ابتدائی علاج کے بعد بس ڈرائیور سمیت 10 شدید زخمی مسافروں کو بہتر علاج کے لیے ضلع اسپتال اور نجی اسپتالوں میں ریفر کر دیا گیا ہے۔

انہوں نے بتایا کہ بس میں تقریباً 60 افراد سوار تھے، جو سبھی اتر پردیش کے سونولی بارڈر سے متصل نیپال کے نول پرسی (نول پرسی) اور روپندیہی اضلاع کے رہنے والے ہیں۔ یہ جتھا گزشتہ 19 اگست کو نیپال سے بس کے ذریعے یاترا کے لیے روانہ ہوا تھا۔

سی ایچ سی میں زیر علاج زخمی مسافروں نے بتایا کہ وہ سبھی ویشنو دیوی اور مہاکالیشور سمیت ملک کے کئی اہم مذہبی مقامات کے درشن کرتے ہوئے ہریدوار پہنچے تھے۔ ہریدوار سے واپسی کے بعد اب انہیں ایودھیا میں رام للا کے درشن کے لیے جانا تھا۔ ایودھیا میں درشن کے بعد ان کا 3 ستمبر کو واپس نیپال پہنچنے کا منصوبہ تھا، لیکن راستے میں ہی یہ حادثہ پیش آ گیا۔ فی الحال پولیس معاملے کی تحقیقات کر رہی ہے۔

ہندوستھان سماچار

---------------

ہندوستان سماچار / عبدالواحد