ریاست کے ہیلتھ سسٹم کو مضبوط بنانے میں طبی اہلکاروں کا کردار اہم :نشانتپٹنہ، 19 ستمبر (ہ س)۔ ریاست میں معیاری صحت خدمات کو مزید مضبوط بنانے کی سمت میں محکمہ صحت حکومت بہار نے ایک اہم قدم اٹھایا ہے۔ بہار تنکینی سروس کمیشن (بی ٹی ایس سی) کی سفارش پر منتخب 792 ڈریسر، 644 ایکسرے ٹیکنیشن اور 24 فارماسسٹ کی ریاست کے مختلف سرکاری صحت اداروں میں تعیناتی کر دی گئی ہے۔792 ڈریسر کے عہدوں پر منتخب امیدواروں میں 135 خواتین اور 657 مرد امیدوار شامل ہیں۔ اسی طرح 644 ایکسرے ٹکنیشین کے عہدوں پر 135 خواتین اور 511 مرد امیدواروں کا انتخاب کیا گیا ہے۔ اس کے علاوہ 24 فارماسسٹوں کی بھی تعیناتی کی گئی ہے۔ اس سے قبل 846 فارماسسٹوں کی تعیناتی کی جا چکی تھی۔ اس طرح اب تک مجموعی طور پر 870 فارماسسٹوں کی تعیناتی مکمل ہو چکی ہے۔ان تکنیکی اہلکاروں کی تقرری سے ریاست کے میڈیکل کالجوں و اسپتالوں، ضلعی اسپتالوں، سب ڈویژنل اسپتالوں، کمیونٹی ہیلتھ سینٹروں (سی ایچ سی)، ریفرل اسپتالوں اور دیگر سرکاری صحت اداروں میں ڈریسر اور ایکسرے ٹکنیشین کی کمی دور ہوگی۔ اس سے اسپتالوں میں صحت خدمات کے معیار، کارکردگی اور فوری خدمات میں نمایاں بہتری آئے گی۔ ساتھ ہی مریضوں کو فراہم کی جانے والی ایکسرے اور دیگر تشخیصی سہولیات زیادہ آسان، بہتر اور مؤثر انداز میں دستیاب ہو سکیں گی۔محکمہ صحت نے تعیناتی کے پورے عمل کو شفاف، میرٹ پر مبنی اور حساس بنایا ہے۔ تعیناتی کے لیے نیشنل انفارمیٹکس سینٹر (این آئی سی) کے سافٹ ویئر کے ذریعے رینڈمائزیشن کا طریقہ اختیار کیا گیا ہے۔ معذور امیدواروں کو حتی الامکان ان کے آبائی ضلع (ہوم ڈسٹرکٹ) میں تعینات کیا گیا ہے۔ وہیں خواتین اور مرد امیدواروں کو ان کی میرٹ کے مطابق قریبی اضلاع کے نزدیک تعیناتی دینے کی کوشش کی گئی ہے۔تمام ڈریسر، ایکسرے ٹکنیشین اور فارماسسٹ کو ہدایت دی گئی ہے کہ وہ ایک ماہ کے اندر اپنے تمام تعلیمی اور دیگر ضروری اصل اسنادکے ساتھ متعلقہ ادارے میں اپنا تعاون پیش کریں ۔ متعلقہ ادارے کے سپرنٹنڈنٹ/سپرنٹنڈنٹ-کم-چیف میڈیکل آفیسر کے ذریعہ ان کی اسنادکا اصل ریکارڈ سے موازنہ کرکے تصدیق یقینی بنائی جائے گی۔ اس کے بعد تین ماہ کے اندر جاری کرنے والے اداروں سے ان کی جانچ اور تصدیق کا عمل مکمل کرکے محکمہ کو رپورٹ پیش کی جائے گی۔ وزیرِ صحت جناب نشانت نے تمام نو تعینات ڈریسر، ایکسرے ٹکنیشین اور فارماسسٹ کو دلی مبارکباد اور نیک خواہشات پیش کرتے ہوئے کہا کہ ریاست کے صحت نظام کو مضبوط بنانے میں ان کا کردار اہم ہے۔ انہوں نے کہا کہ حکومت کا مقصد تمام سرکاری صحت اداروں میں مناسب افرادی قوت فراہم کرکے عام شہریوں کو معیاری، آسان اور بروقت صحت خدمات یقینی بنانا ہے۔انہوں نے امید ظاہر کی کہ تمام ڈریسر اور ایکسرے ٹیکنیشن پوری دیانت داری اور ذمہ داری کے ساتھ اپنے فرائض انجام دیں گے اور مریضوں کو بہتر صحت خدمات فراہم کرنے میں اہم کردار ادا کریں گے۔

ہندوستھان سماچار

ہندوستان سماچار / Mohammad Afzal Hassan