پٹنہ، 19 ستمبر (ہ س)۔

بہار کے وزیر اعلیٰ سمراٹ چودھری نے ہفتہ کے روز ’’سیوا سنکلپ ابھیان‘‘ کے تحت پلانیٹریم میں نیشنل انوویشن چیلنج پروگرام کا افتتاح کیا۔ پروگرام سے خطاب کرتے ہوئے انہوں نے کہا کہ خدمت کے ذریعے 2047 تک ترقی یافتہ ہندوستان کے عزم کو پورا کرنے کے لیے سب کو مل کر کام کرنا ہوگا۔

وزیر اعلیٰ نے کہا کہ وزیر اعظم نریندر مودی کا وژن اور اختراعی نقطۂ نظر سب کو متاثر کرتا ہے۔ ریاستی حکومت بھی انہی مقاصد کے ساتھ آگے بڑھ رہی ہے۔ بہار کی ترقی کے سفر میں خدمت، اختراع، ٹیکنالوجی اور صنعت کاری کا اہم کردار ہے۔ بہار کو نئی بلندیوں تک لے جانے کے لیے ریاست کے نوجوانوں اور بڑی آبادی کو چیلنج نہیں بلکہ ترقی کی طاقت بنانے کی ضرورت ہے۔

انہوں نے کہا کہ ’’سیوا سنکلپ ابھیان‘‘ اور ’’سیوا فرسٹ انوویشن چیلنج (ایسٹرن زون)‘‘ جیسی کوششیں نوجوانوں میں خدمت، اختراع اور نئی سوچ کے جذبے کو فروغ دے رہی ہیں۔ ٹیکنالوجی کے ذریعے عام لوگوں کی زندگیوں کو آسان بنانے کے لیے مسلسل کوششیں کی جا رہی ہیں۔ یو پی آئی کا حوالہ دیتے ہوئے انہوں نے کہا کہ اس نے ڈیجیٹل لین دین کے شعبے میں انقلاب برپا کر دیا ہے اور ہندوستان میں اس کا بڑے پیمانے پر استعمال ہو رہا ہے۔وزیر اعلیٰ نے کہا کہ بہار میں صنعتی ماحول تیار کیا گیا ہے اور اب تک تقریباً 1000 صنعتوں کے لیے زمین فراہم کی جا چکی ہے۔ ریاست میں اگلے پانچ سال کے دوران 10 ہزار صنعتیں قائم کرنے کا ہدف مقرر کیا گیا ہے۔ انہوں نے کہا کہ بہار سے تقریباً 12 لاکھ افراد روزگار کی تلاش میں ریاست سے باہر جا رہے ہیں۔ حکومت کا مقصد یہ یقینی بنانا ہے کہ لوگوں کو روزگار کے لیے ریاست سے باہر نہ جانا پڑے۔ اس مقصد کے لیے صنعتوں اور کاروباری افراد کی حوصلہ افزائی کی جا رہی ہے۔

سمراٹ چودھری نے کہا کہ نوجوان صنعت کار نئے اسٹارٹ اپس کے ذریعے بہار کی سمت بدل سکتے ہیں اور ریاستی حکومت ان کی کوششوں کو ہر ممکن تعاون فراہم کرے گی۔ انہوں نے کہا کہ آئی ٹی کے شعبے میں اختراع کو فروغ دینے کے لیے بہار ٹیک پورٹل کے ذریعے کام کیا جا رہا ہے۔ ریاستی حکومت تعلیم کے شعبے میں بھی تیزی سے اقدامات کر رہی ہے۔وزیر اعلیٰ نے بتایا کہ 700 سرسوتی ودیا نکیتن ماڈل اسکول قائم کیے گئے ہیں۔ لائیو کلاسز اور جے ای ای و نیٹ کی تیاری کی سہولیات ’’ودیارتھی ساتھی‘‘ ایپ کے ذریعے فراہم کی جا رہی ہیں۔ نوجوانوں اور طلبہ کے لیے 24 گھنٹے آن لائن ٹیوشن اور رہنمائی کی سہولت بھی دستیاب ہے۔

وزیر اعلیٰ نے کہا کہ تقریباً 1.42 لاکھ بچے رات ایک بجے تک آن لائن تعلیم کی سہولت سے استفادہ کر رہے ہیں اور اس دوران اساتذہ بھی دستیاب رہتے ہیں۔ اس مقصد کے لیے 75 ہزار اساتذہ کا اندراج کیا گیا ہے۔

خواتین کو بااختیار بنانے کو ترقی کی اہم بنیاد قرار دیتے ہوئے وزیر اعلیٰ نے کہا کہ ریاست میں ایک کروڑ خواتین کو ’’لکھ پتی دیدی‘‘ بنانے کا ہدف مقرر کیا گیا ہے۔ انہوں نے کہا کہ بہار کو خوشحال بنانے کے لیے سب کو مل کر کام کرنا ہوگا۔ نوجوانوں کی توانائی، تکنیکی صلاحیتوں اور کاروباری صلاحیتوں کے امتزاج سے ریاست کو تیز رفتار ترقی کی راہ پر گامزن کیا جائے گا۔انہوں نے کہا کہ حکومت کا مقصد ایک ایسا بہار بنانا ہے جہاں خدمت کے ساتھ جدت، روزگار اور صنعت کے نئے مواقع مسلسل دستیاب ہوں۔

اس سے قبل پروگرام کے آغاز پر وزیر اعلیٰ نے ڈاکٹر شیاما پرساد مکھرجی کار ریلی کے تحت 25 گاڑیوں کو ہری جھنڈی دکھا کر روانہ کیا۔ اس کے بعد انہوں نے اختراعی نمائش کا دورہ کیا اور مختلف اسٹالز کا معائنہ کیا۔ نمائش کے دوران وزیر اعلیٰ نے نوجوان کاروباری افراد سے اسٹارٹ اپس اور اختراعات کے بارے میں گفتگو کی اور ان کی مصنوعات کے بارے میں معلومات حاصل کیں۔

ہندوستھان سماچار

ہندوستان سماچار / Mohammad Afzal Hassan