نئی دہلی، 19 ستمبر (ہ س)۔ بھارتی مردوں کی کبڈی ٹیم 2026 کے ایشیائی کھیلوں میں ملک کی نمائندگی کرنے کے لیے تیار ہے۔ ٹیم کے کھلاڑی اسلم انعام دار اور پہلی بار ایشیائی کھیلوں میں حصہ لے رہے دیوانک دلال نے کہا ہے کہ ٹیم ایک بار پھر سونے کا تمغہ ملک کے لیے جیتنے کے لیے پُرعزم ہے۔ دیوانک نے کہا کہ ٹیم نے انہیں منتخب کیا ہے، تو انہیں یہ کرنا ہی ہوگا۔

بھارتی مردوں کی ٹیم ایشیائی کھیلوں میں اپنی مہم کا آغاز 21 ستمبر کو میزبان جاپان کے خلاف کرے گی۔ اس کے بعد ٹیم 22 ستمبر کو جنوبی کوریا، 23 ستمبر کو بنگلہ دیش اور 24 ستمبر کو چینی تائپے سے مقابلہ کرے گی۔ سیمی فائنل مقابلے 25 ستمبر کو ہوں گے، جبکہ سونے کے تمغے کا مقابلہ 26 ستمبر کو کھیلا جائے گا۔ بھارت گروپ اے میں ہے۔

دیوانک دلال کی یہ ایشیائی کھیلوں میں پہلی شرکت ہے۔ پرو کبڈی لیگ (پی کے ایل) سیزن 12 میں 271 ریڈ پوائنٹس کے ساتھ دوسرے سب سے زیادہ پوائنٹس حاصل کرنے والے ریڈر دلال نے کہا کہ بھارتی ٹیم میں انتخاب کے بعد ان کی ذمہ داری بڑھ گئی ہے۔

دیوانک نے ایک بیان میں کہا کہ یہ میرے پہلے ایشیائی کھیل ہیں۔ میں اپنے لیے، اپنے خاندان اور اپنے کوچ کے لیے خوش ہوں۔ میں سب کے لیے خوش ہوں۔ اب جب میں جا رہا ہوں تو میری ذمہ داریاں بڑھ گئی ہیں۔ مجھے بھارت کے لیے سونے کا تمغہ لانا ہوگا۔ اگر بھارت نے مجھے منتخب کیا ہے تو مجھے یہ کرنا ہی ہوگا۔

23 سالہ کھلاڑی کا ماننا ہے کہ بھارتی ٹیم سے وابستہ توقعات کو دباؤ کے طور پر نہیں بلکہ ذمہ داری کے طور پر دیکھا جانا چاہیے۔ انہوں نے کہا، آپ کو دباؤ لینے کی ضرورت نہیں ہے۔ دباؤ اور ذمہ داری دو الگ الگ چیزیں ہیں۔ یہاں صرف ذمہ داری ہے، دباؤ نہیں۔ ہم نہیں مانتے کہ دباؤ جیسی کوئی چیز ہوتی ہے۔ اگر آپ دباؤ لیں گے تو کھیل نہیں پائیں گے۔ اگر کھیلیں گے نہیں تو بھارت کیسے جیتے گا؟ ہم بغیر دباؤ کے کھیلیں گے اور جیتیں گے۔

2022 کے ایشیائی کھیلوں میں بھارت کی سونے کا تمغہ جیتنے والی ٹیم کا حصہ رہے اسلم انعام دار کا ماننا ہے کہ موجودہ ٹیم نے پرو کبڈی لیگ اور قومی کیمپوں کے دوران ساتھ کھیلنے سے اچھی ٹیم بانڈنگ تیار کی ہے۔

انعام دار نے کہا، ٹیم کے ساتھ بہت اچھی بانڈنگ ہے۔ یہ سب ہمارے اسٹار کھلاڑی ہیں۔ ہمیں پی کے ایل میں بہت اچھا تجربہ ملا ہے۔ انہوں نے پی کے ایل میں بہت اچھا کھیل دکھایا ہے۔ بھارتی ٹیم میں اچھی بانڈنگ ہے۔

انعام دار نے تجربہ کار کھلاڑیوں کے کردار پر بھی زور دیا، جو ٹیم کے نوجوان کھلاڑیوں کو ان کی پہلی بین الاقوامی مہم میں اعتماد کے ساتھ کھیلنے میں مدد کر رہے ہیں۔

انہوں نے کہا کہ آیان، انکت، راہل جیسے نوجوان کھلاڑیوں کے پاس پی کے ایل اور نیشنلز کا کافی تجربہ ہے، لیکن بین الاقوامی میچ کچھ مختلف ہوتا ہے۔ اس لیے تسلسل بہت اہم ہے۔ انہیں کہا جاتا ہے کہ وہ کھلے ذہن کے ساتھ کھیلیں، ملک کی نمائندگی کرنے پر فخر محسوس کریں اور سونے کے تمغے کے لیے پوری طاقت سے مقابلہ کریں۔

2026 ایشیائی کھیلوں کے لیے بھارتی مردوں کی کبڈی ٹیم

سنیل کمار (کپتان)، پون سہراوت، انکت جگلان، اسلم انعام دار، آشو ملک، ایان لوہچب، دیوانک دلال، ارجن دیشوال، جے دیپ دہیا، راہل سیٹھ پال، گورو کھتری، سمت سنگوان۔

ہندوستھان سماچار

---------------

ہندوستان سماچار / عبدالواحد