سیول، 18 ستمبر (ہ س)۔

ڈیوس کپ کوالیفائر کے دوسرے راؤنڈ کے مقابلے میں بھارت پہلے دن میزبان جنوبی کوریا کے خلاف 0-2 سے پیچھے ہوگیا۔ سیول اولمپک پارک ٹینس سینٹر میں جمعہ کو کھیلے گئے مقابلوں میں دھاکینیشور سریش اور سُمِت ناگل دونوں کو تین، تین سیٹ کے مقابلوں میں شکست کا سامنا کرنا پڑا۔

دنیا کے 157 ویں نمبر کے کھلاڑی سون وو کوون نے ابتدائی سست کھیل سے واپسی کرتے ہوئے پہلے سنگلز مقابلے میں عالمی نمبر 367 دھاکینیشور کو 3-6، 6-3، 6-4 سے شکست دی۔ یہ ڈیوس کپ میں دھاکینیشور کی پہلی شکست ہے۔ 26 سالہ بھارتی کھلاڑی نے گزشتہ سال سوئٹزرلینڈ کے خلاف ڈیبیو کے بعد ڈیوس کپ میں تین سنگلز اور ایک ڈبلز مقابلہ جیتا تھا۔

اس کے بعد سُمِت ناگل کو بھی تین گھنٹے چھ منٹ تک جاری رہنے والے مقابلے میں ہیون چنگ کے ہاتھوں 2-6، 6-4، 7-5 سے شکست ہوئی۔ ناگل نے پہلا سیٹ جیتنے کے علاوہ دوسرے سیٹ میں ایک گیم کی برتری بھی حاصل کرلی تھی، لیکن وہ اس کا فائدہ نہیں اٹھا سکے۔2018 کے آسٹریلین اوپن کے سیمی فائنل تک پہنچنے والے ہیون چنگ اس وقت عالمی رینکنگ میں 549 ویں نمبر پر ہیں۔ انجریز کی وجہ سے ان کا کیریئر بھی متاثر رہا ہے۔ ناگل عالمی رینکنگ میں ان سے 300 سے زیادہ مقام اوپر ہیں۔ہفتہ کو این سری رام بالاجی اور نکی پونچا کی جوڑی ڈبلز مقابلے میں جی سونگ نام اور اوئی سونگ پارک کی جوڑی کا سامنا کرے گی۔ اس کے بعد ریورس سنگلز مقابلے کھیلے جائیں گے۔ کوارٹر فائنل میں جگہ بنانے کے لیے بھارت کو ہفتہ کو اپنے تینوں مقابلے جیتنے ہوں گے۔

بھارت 1996 کے بعد پہلی بار ڈیوس کپ کے کوارٹر فائنل میں جگہ بنانے کی کوشش کر رہا ہے۔ ڈیوس کپ کی تاریخ میں بھارت صرف دو مرتبہ 0-2 سے پچھڑنے کے بعد مقابلہ جیتنے میں کامیاب رہا ہے۔ بھارت نے 2010 میں چنئی میں برازیل اور 2018 میں تیانجن میں چین کے خلاف ایسی ہی واپسی کی تھی۔

ہندوستھان سماچار

ہندوستان سماچار / Mohammad Khan