لزبن، 18 ستمبر (ہ س)۔ کرسٹیانو رونالڈو کو نئے ہیڈ کوچ جارج زیسوس کی قیادت میں تشکیل دی گئی پرتگال کی پہلی ٹیم میں شامل کر لیا گیا ہے۔ 41 سالہ رونالڈو آئندہ یوئیفا نیشنز لیگ کے مقابلوں کے لیے ٹیم میں جگہ بنانے میں کامیاب رہے ہیں اور وہ قومی ٹیم کے کپتان کی حیثیت سے اپنی ذمہ داری برقرار رکھیں گے۔

رونالڈو نے رواں موسم گرما میں ہونے والے فیفا ورلڈ کپ کو اپنا آخری عالمی کپ قرار دیا تھا، تاہم انہوں نے ابھی تک بین الاقوامی فٹ بال سے ریٹائرمنٹ کی تاریخ واضح نہیں کی ہے۔ 2028 کی یورپی چمپئن شپ کے دوران ان کی عمر 43 سال ہوگی۔

جارج زیسوس کے پرتگال کا ہیڈ کوچ بننے کے بعد یہ پہلی ٹیم ہے جس کا اعلان کیا گیا ہے۔ زیسوس نے رابرٹو مارٹینیز کے عہدہ چھوڑنے کے بعد ذمہ داری سنبھالی ہے۔ 2026 فیفا ورلڈ کپ کے پری کوارٹر فائنل میں اسپین کے ہاتھوں پرتگال کی 0-1 سے شکست کے بعد مارٹینیز نے عہدہ چھوڑ دیا تھا۔

زیسوس اس سے قبل سعودی عرب کے کلب النصر میں رونالڈو کی کوچنگ کر چکے ہیں۔ دونوں نے گزشتہ سیزن میں کلب کے ساتھ لیگ کا خطاب بھی جیتا تھا۔ 72 سالہ زیسوس پرتگال میں کوچنگ کے طویل تجربے کے لیے جانے جاتے ہیں۔ وہ اس سے قبل بینفیکا اور اسپورٹنگ لزبن جیسے معروف کلبوں کی ذمہ داری سنبھال چکے ہیں۔

پانچ مرتبہ بیلن ڈی اور جیتنے والے رونالڈو مردوں کے بین الاقوامی فٹ بال میں 146 گول کے ساتھ سب سے زیادہ گول کرنے والے کھلاڑی ہیں۔ انہوں نے 2016 میں پرتگال کو یورپی چمپئن شپ کا خطاب دلانے میں اہم کردار ادا کیا تھا اور اس کے بعد بھی قومی ٹیم کے اہم کھلاڑیوں میں شامل رہے ہیں۔پرتگال نیشنز لیگ کی مہم کا آغاز 24 ستمبر کو گھریلو میدان پر ویلز کے خلاف کرے گا۔ اس کے تین دن بعد ٹیم ناروے کے میدان میں اترے گی۔ اس کے بعد پرتگال یکم اکتوبر کو ڈنمارک کے خلاف اس کے گھریلو میدان پر کھیلے گا، جبکہ 4 اکتوبر کو ناروے کی میزبانی کرے گا۔

ہندوستھان سماچار

ہندوستان سماچار / Mohammad Khan