سیمی فائنل میں اتوار کو بنگلہ دیش سے ہوگا مقابلہ

نیشین (جاپان)، 18 ستمبر (ہ س)۔ بھارتی خواتین کی کرکٹ ٹیم نے ایشین گیمز میں اپنی مہم کا شاندار آغاز کرتے ہوئے جمعہ کو جاپان کو 8 وکٹوں سے شکست دے کر سیمی فائنل میں جگہ بنا لی۔ سیمی فائنل میں بھارتی ٹیم کا مقابلہ بنگلہ دیش سے ہوگا۔

اتوار کی صبح (مقامی وقت کے مطابق) پہلے سیمی فائنل میں پاکستان کا مقابلہ سری لنکا سے ہوگا، جبکہ اس کے بعد دوپہر میں بھارت اور بنگلہ دیش کی ٹیمیں آمنے سامنے ہوں گی۔

جاپان کے خلاف میچ میں بھارتی کپتان ہرمن پریت کور نے ٹاس جیت کر پہلے گیند بازی کرنے کا فیصلہ کیا۔ جاپان کی پوری ٹیم 19.5 اوور میں صرف 57 رن بنا کر آل آوٹ ہوگئی۔

جاپان کی جانب سے آیاکا کاٹو-اسٹیفورڈ نے 47 گیندوں پر سب سے زیادہ 25 رن بنائے، جس میں 2 چوکے شامل تھے۔ ان کے علاوہ ہارونا ایواساکی نے 22 گیندوں پر ایک چوکے کی مدد سے 10 رن بنائے۔ ان دونوں کے علاوہ جاپان کی کوئی بھی بلے باز دوہرے ہندسے تک نہیں پہنچ سکی۔ جاپان نے اپنی پوری اننگز میں صرف تین چوکے لگائے۔

بھارت کی جانب سے شری چَرنی نے 4 وکٹیں، شیفالی ورما نے 2 وکٹیں، جبکہ دیپتی شرما اور شری ینکا پاٹل نے ایک، ایک وکٹ حاصل کی۔ جاپان کی دو بلے باز رن آوٹ ہوئیں۔

58 رنوں کے ہدف کا تعاقب کرنے اتری بھارتی ٹیم کو شیفالی ورما نے تیز شروعات دلائی اور پہلے ہی اوور میں 4 چوکے لگا دیے۔ تاہم دوسرے اوور میں نانوہا یاسوموٹو نے جی. کمالنی نے صفر پر آوٹ کرکے بھارت کو پہلا جھٹکا دیا۔ انہوں نے دوسرے اوور میں کوئی رن نہیں دیا اور وکٹ حاصل کی۔

اس کے بعد بلے بازی کے لیے آنے والی بھارتی پھول مالی بھی زیادہ کچھ نہ کر سکیں اور آیاکا کاٹو-اسٹیفورڈ کا شکار بن گئیں۔ بھارتی نے 6 رن بنائے۔

تاہم دوسری جانب شیفالی نے جارحانہ بلے بازی جاری رکھی اور پانچویں اوور کی آخری گیند پر چھکا لگا کر بھارتی ٹیم کو 8 وکٹوں سے آسان فتح دلا دی۔ شیفالی نے صرف 15 گیندوں پر ناقابل شکست 40 رن بنائے۔ اس دوران انہوں نے 6 چوکے اور 2 چھکے لگائے۔ رچا گھوش نے بھی ان کا بھرپور ساتھ دیا اور 6 گیندوں پر 2 چوکوں کی مدد سے 12 رن بنا کر ناقابل شکست واپس لوٹیں۔

جاپان کی جانب سے آیاکا کاٹو-اسٹیفورڈ اور نانوہا یاسوموٹو نے ایک، ایک وکٹ حاصل کی۔

بھارتی ٹیم اب اتوار کو سیمی فائنل میں بنگلہ دیش سے مقابلہ کرے گی، جبکہ اسی روز پہلے سیمی فائنل میں پاکستان کا سامنا سری لنکا سے ہوگا۔

ہندوستھان سماچار

---------------

ہندوستان سماچار / عبدالسلام صدیقی