علی گڑھ, 18 ستمبر (ہ س)۔
علی گڑھ مسلم یونیورسٹی کے ویمنس کالج کے شعبۂ بایوکیمسٹری کی بی ایس سی سالِ سوم کی طالبہ نبیلہ خان نے کھیل کے میدان میں شاندار کامیابی حاصل کرتے ہوئے قومی سطح کے رولر ڈربی مقابلے میں طلائی تمغہ جیتا ہے۔ نبیلہ خان نے راجستھان کے بیکانیر میں منعقدہ ڈاکٹر کرنی سنگھ جی رولر ڈربی فیڈریشن کپ 2026 میں اترپردیش کی ٹیم کی نمائندگی کرتے ہوئے یہ اعزاز حاصل کیا۔
اترپردیش کی ٹیم نے پورے ٹورنامنٹ میں شاندار کارکردگی کا مظاہرہ کرتے ہوئے تمام مقابلوں میں کامیابی حاصل کی۔
ٹیم نے راجستھان کو 40-11، تلنگانہ کو 83-22 اور کرناٹک کو 36-5 سے شکست دے کر فائنل میں جگہ بنائی اور آخرکار طلائی تمغہ اپنے نام کیا۔
نبیلہ خان کی اس کامیابی پر علی گڑھ واپس پہنچنے کے بعد ویمنس کالج کی پرنسپل پروفیسر شگفتہ امتیاز اور اسسٹنٹ ڈائریکٹر و انچارج فزیکل ایجوکیشن ڈاکٹر نازیہ خان نے خوشی کا اظہار کرتے ہوئے انہیں مبارکباد پیش کی۔
ڈاکٹر نازیہ خان نے کہا کہ نبیلہ کی کامیابی دیگر طالبات کے لیے بھی حوصلہ افزا ہے اور انہیں کھیلوں کے میدان میں آگے بڑھنے کی ترغیب دے گی۔
نبیلہ خان نے کہا کہ وہ تعلیم کے ساتھ ساتھ کھیلوں میں بھی مسلسل آگے بڑھنے کی کوشش کر رہی ہیں۔ ان کا خواب ہندوستان کی قومی ٹیم کی نمائندگی کرنا ہے اور وہ اس مقصد کے حصول کے لیے مزید محنت جاری رکھیں گی۔
---------------
ہندوستان سماچار / سید کامران علی گڑھ
