ہوبارٹ، 17 ستمبر (ہ س)۔ آسٹریلیا کے تجربہ کار وکٹ کیپر بلے باز میتھیو ویڈ نے بگ بیش لیگ (بی بی ایل) کرکٹ سے ریٹائرمنٹ کا اعلان کر دیا ہے۔ اب وہ اپنی پوری توجہ کوچنگ کیریئر پر مرکوز کریں گے۔ ویڈ اس وقت آسٹریلوی مرد ٹیم کے محدود اوورز کے بیٹنگ کوچ کی ذمہ داری بھی سنبھال رہے ہیں۔

ویڈ گزشتہ سال بھی آسٹریلوی مرد ٹیم کے ساتھ مشیر کے طور پر کام کر رہے تھے اور اسی دوران وہ ہوبارٹ ہریکینز کے لیے بگ بیش لیگ میں کھیلتے رہے۔ تاہم، انہوں نے 27-2026 سیزن سے قبل مکمل طور پر کھلاڑی کے طور پر کرکٹ سے دور ہونے کا فیصلہ کیا ہے۔

ویڈ نے 2024 ٹی-20 ورلڈ کپ کے بعد بین الاقوامی کرکٹ سے ریٹائرمنٹ لے لی تھی۔ اب بگ بیش لیگ کو الوداع کہنے کے ساتھ انہوں نے اس ٹورنامنٹ کی تاریخ کے اہم کھلاڑیوں میں شامل ہوتے ہوئے اپنے کیریئر کا اختتام کیا ہے۔

ویڈ نے بگ بیش لیگ کے افتتاحی سیزن 11-2010 میں میلبرن اسٹارز کے ساتھ اپنے کیریئر کا آغاز کیا تھا، جہاں انہوں نے عظیم اسپنر شین وارن کے ساتھ کھیلا۔ انہوں نے اسٹارز کے لیے 16 اور میلبرن رینیگیڈز کے لیے 13 میچ کھیلے۔ اس کے بعد وہ اپنے آبائی صوبے تسمانیہ واپس آئے اور ہوبارٹ ہریکینز کے لیے 90 مقابلوں میں میدان پر اترے۔

بگ بیش لیگ میں سب سے زیادہ رنز بنانے والے کھلاڑیوں کی فہرست میں ویڈ نویں مقام پر ہیں، جبکہ وکٹ کے پیچھے سب سے زیادہ شکار کرنے والے کھلاڑیوں میں وہ پانچویں نمبر پر ہیں۔ ہریکینز کے لیے بین میکڈرموٹ اور ڈی آرسی شارٹ نے ان سے زیادہ رنز بنائے ہیں، لیکن ٹیم کے لیے ویڈ کی بہترین انفرادی اننگز 130 رنز ناٹ آؤٹ ہے، جس سے بڑی اننگز کسی دوسرے بلے باز نے نہیں کھیلی۔

ویڈ ہریکینز کی پہلی بگ بیش لیگ ٹائٹل جیت میں بھی اہم کردار ادا کر چکے ہیں۔ ٹیم نے 25-2024 سیزن میں پہلی بار اس مقابلے کا خطاب اپنے نام کیا تھا۔

ہریکینز کے کوچ جیف وان نے ایک سرکاری بیان میں کہا کہ “ویڈی ان کرکٹرز میں شامل ہیں، جنہیں آپ ہمیشہ اپنی ٹیم میں رکھنا چاہتے ہیں۔ جب بھی وہ میدان میں اترتے تھے، پوری طاقت کے ساتھ مقابلہ کرتے تھے اور بہت تیزی سے میچ کا رخ بدلنے کی صلاحیت رکھتے تھے۔”

انہوں نے کہا، “لیکن اس سے بھی زیادہ اہم بات یہ ہے کہ انہوں نے اپنے آس پاس کے کھلاڑیوں کو بھی بہت کچھ دیا۔ ان کی کرکٹ سمجھ شاندار ہے اور وہ ہمیشہ اپنا علم بانٹنے اور ساتھی کھلاڑیوں کو بہتر بننے کے لیے چیلنج کرنے کے لیے تیار رہتے تھے۔”

وان نے کہا کہ “ہمارے نظام میں ایسے کئی کھلاڑی ہیں، جنہیں میٹ کے ساتھ کھیلنے سے فائدہ ہوا ہے اور میرا خیال ہے کہ یہ یہاں ان کی وراثت کا ایک اہم حصہ ہوگا۔”

ہریکینز کی ہائی پرفارمنس منیجر سیلین بیمز نے بھی ویڈ کی خدمات کو سراہا۔ انہوں نے کہا، “میتھیو طویل عرصے سے ہریکینز اور تسمانیائی کرکٹ کے لیے انتہائی اہم شخصیت رہے ہیں۔ ان کا ریکارڈ خود بہت کچھ بیان کرتا ہے، لیکن اعداد و شمار ہمیشہ اس اثر کو ظاہر نہیں کرتے جو انہوں نے اپنے اردگرد کے کھلاڑیوں اور لوگوں پر ڈالا۔”

انہوں نے کہا کہ “وہ ایک شاندار مقابلہ کرنے والے کھلاڑی، لیڈر اور اعلیٰ معیار قائم کرنے والے کرکٹر رہے ہیں۔ کھیل کے اعلیٰ ترین سطح پر ان کا تجربہ ہمارے کھلاڑیوں کے لیے بے حد قیمتی رہا ہے۔”

بیمز نے کہا کہ “میٹ نے ہریکینز کو بہت کچھ دیا ہے اور کلب کے لیے ان کی خدمات پر ہم بے حد شکر گزار ہیں۔”

ہندوستھان سماچار

---------------

ہندوستان سماچار / عبدالواحد