نئی دہلی، 16 ستمبر (ہ س)۔ کیشو پورم علاقے میں سگریٹ جلانے کے لیے ماچس مانگنے کے معاملے پر ہوئے تنازعہ میں ایک نوجوان کو چاقو مار کر قتل کر دیا گیا۔ واردات میں اس کے ساتھ موجود ایک اور نوجوان بھی زخمی ہو گیا۔ پولیس نے معاملے میں دو نوجوانوں کو گرفتار کرنے کے ساتھ ایک نابالغ کو بھی پکڑا ہے۔ گرفتار ملزمان کی شناخت نریش بہادر عرف نیپالی (19) اور ترون (19) کے طور پر ہوئی ہے۔

پولیس کے مطابق، نریش نے چاقو سے بھوانی اور آشا رام پر حملہ کیا، جبکہ ترون اور نابالغ نے دونوں کے ساتھ مارپیٹ کی۔ مرکزی ملزم کی نشاندہی پر واردات میں استعمال کیا گیا خون آلود چاقو برآمد کر لیا گیا ہے۔

پولیس کے مطابق، منگل کو کیشو پورم تھانے میں چاقوبازی سے متعلق پی سی آر کال موصول ہوئی تھی۔ پولیس ٹیم موقع پر پہنچی تو ڈی ایس آئی آئی ڈی سی شراب کی دکان کے سامنے فٹ پاتھ پر خون پڑا ہوا ملا۔ تفتیش کے دوران معلوم ہوا کہ دو زخمی نوجوانوں کو دیپ چند بندھو اسپتال لے جایا گیا ہے۔ اسپتال میں ڈاکٹروں نے بھوانی (30) کو مردہ قرار دے دیا۔ اس کی کمر کے بائیں جانب گہرا زخم تھا۔ وہیں آشا رام (32) کا علاج جاری تھا۔ اس کے سینے کے نچلے بائیں حصے میں چاقو لگا تھا اور وہ بیان دینے کی حالت میں نہیں تھا۔

تفتیش میں معلوم ہوا کہ بھوانی اور آشا رام کا 2-3 نوجوانوں سے ماچس مانگنے کے معاملے پر تنازعہ ہوا تھا۔ پولیس کے مطابق، نوجوانوں نے سگریٹ جلانے کے لیے ان سے ماچس مانگی تھی۔ ماچس نہ دینے پر بحث ہوئی اور معاملہ مارپیٹ تک پہنچ گیا۔ الزام ہے کہ اس کے بعد تینوں نے دونوں پر حملہ کر دیا۔ اسی دوران نریش نے چاقو سے دونوں پر وار کیے۔ معاملے میں ایف آئی آر نمبر 321/26، بی این ایس کی دفعہ 103(1)/109(1) کے تحت کیس درج کیا گیا۔ موقع پر کرائم ٹیم کو بلا کر جانچ کرائی گئی اور شواہد اکٹھے کیے گئے۔

پولیس نے نریش اور ترون کو گرفتار کر لیا، جبکہ ایک نابالغ کو بھی پکڑا گیا۔ پولیس کے مطابق، نریش کی نشاندہی پر خون آلود چاقو برآمد کر لیا گیا۔ معاملے میں مزید تفتیش جاری ہے۔

ہندوستھان سماچار

---------------

ہندوستان سماچار / عبدالواحد