دیوریا، 15 ستمبر (ہ س)۔ اتر پردیش کے ضلع دیوریا میں بھٹنی تھانہ علاقے میں منگل کی صبح سابق چیئرمین راجیش کمار گپتا (55) اور ان کے وکیل بیٹے اجے گپتا (28) پر چھ افراد نے چاقو سے حملہ کر دیا۔ کسی بات پر ہوئے تنازعہ کے بعد ملزمان نے باپ بیٹے پر چاقو سے حملہ کردیا، جس سے دونوں شدید زخمی ہو گئے۔ اہل خانہ نے انہیں علاج کے لیے میڈیکل کالج میں داخل کرایا۔ حالت تشویش ناک ہونے پر سابق چیئرمین کو بہتر علاج کے لیے گورکھپور ریفر کر دیا گیا۔

اطلاعات کے مطابق ہتوا گاؤں کے رہنے والے راجیش کمار گپتا بھٹنی نگر پنچایت کے سابق چیئرمین رہ چکے ہیں۔ ان کے بیٹے اجے گپتا اس وقت دیوانی عدالت میں وکیل ہیں۔ اجے گپتا کچھ عرصے سے صدر کوتوالی تھانہ علاقے کے بھوجولی میں رہ رہے تھے۔ بتایا جا رہا ہے کہ کسی بات پر باپ بیٹے کا کچھ لوگوں سے تنازعہ ہو گیا۔ الزام ہے کہ اسی دوران چھ افراد موقع پر پہنچے اور ان پر چاقو سے حملہ کر دیا۔ اچانک ہوئے حملے میں دونوں زخمی ہو کر زمین پر گر پڑے۔

واقعے کے بعد آس پاس کے لوگوں کی بھیڑ جمع ہو گئی۔ اہل خانہ دونوں کو دیوریا میڈیکل کالج لے گئے، جہاں ڈاکٹروں نے ان کا علاج شروع کیا۔ڈاکٹروں نے سابق چیئرمین راجیش کمار گپتا کی حالت تشویش ناک دیکھتے ہوئے انہیں بہتر علاج کے لیے گورکھپور ریفر کر دیا، جبکہ ان کے وکیل بیٹے اجے گپتا کا علاج جاری ہے۔

واقعے کی اطلاع ملنے کے بعد تھانہ انچارج پولیس فورس کے ساتھ موقع پر پہنچے اور معاملے کی تحقیقات شروع کر دیں۔ تھانہ انچارج ششی بھوشن رائے نے بتایا کہ پولیس حملے کی وجوہات اور واقعے میں ملوث ملزمان کے بارے میں معلومات اکٹھی کر رہی ہے۔ زخمیوں کے اہل خانہ سے بھی واقعے کے سلسلے میں پوچھ گچھ کی جا رہی ہے۔ تحریری شکایت اور تحقیقات کی بنیاد پر مزید کارروائی کی جائے گی۔

ہندوستھان سماچار

ہندوستان سماچار / محمد شہزاد