موہالی، 14 ستمبر (ہ س)۔ ہیرو مینز ایشین چیمپئنز ٹرافی-2026 موہالی اور جالندھر، پنجاب میں 27 اکتوبر سے 5 نومبر تک منعقد ہوگی۔ ٹورنامنٹ کی تاریخوں کا باضابطہ اعلان پنجاب کے وزیر اعلی بھگونت مان نے پیر کو موہالی میں کیا۔

اس باوقار براعظمی سطح کے ہاکی ٹورنامنٹ کے مقابلے اولمپین بلبیر سنگھ سینئر انٹرنیشنل ہاکی اسٹیڈیم موہالی اور اولمپین سرجیت سنگھ ہاکی اسٹیڈیم جالندھر میں کھیلے جائیں گے۔ جالندھر 27 اکتوبر سے 2 نومبر تک افتتاحی تقریب کے ساتھ لیگ مرحلے کے تمام میچوں کی میزبانی کرے گا۔ اس کے بعد ٹورنامنٹ موہالی منتقل ہو جائے گا، جہاں دونوں سیمی فائنل 4 نومبر اور فائنل 5 نومبر کو کھیلے جائیں گے۔

وزیر اعلی بھگونت مان نے کہا کہ تاریخی ہیرو مینز ایشین چیمپئنز ٹرافی 2026 پنجاب کے لیے صرف ایک ہاکی ٹورنامنٹ نہیں ہے بلکہ یہ اس کھیل کی جذباتی وطن واپسی ہے جس نے ہندوستانی ہاکی کے بہت سے مایہ نازکھلاڑی پیدا کیے ہیں۔ پہلی بار پنجاب اپنی سرزمین پر اس قد کے بین الاقوامی ہاکی ٹورنامنٹ کی میزبانی کر رہا ہے۔ حکومت پنجاب اسے ہندوستان اور دنیا بھر کے کھلاڑیوں، تماشائیوں اور ہاکی سے محبت کرنے والوں کے لیے ایک یادگار کھیلوں کی تقریب بنانے کے لیے پرعزم ہے۔

اس موقع پر ہاکی انڈیا کے سکریٹری جنرل بھولا ناتھ سنگھ، ڈائریکٹر جنرل کمانڈر آر کے سریواستو، ایگزیکٹو بورڈ کے ممبر آر پی سنگھ اور ہاکی پنجاب کے صدر نتن کوہلی بھی موجود تھے۔

ایشیا کی سرفہرست ہاکی ٹیموں کے ٹورنامنٹ میں حصہ لینے کی توقع ہے۔ حصہ لینے والی ٹیموں میں بھارت، پاکستان، جنوبی کوریا، ملائیشیا، چین اور جاپان شامل ہیں جبکہ عمان اور بنگلہ دیش بطور ریزرو ٹیمیں ہیں۔

ہیرو مینز ایشین چیمپئنز ٹرافی ایشین ہاکی فیڈریشن کے کیلنڈر کے بڑے ٹورنامنٹس میں سے ایک ہے۔ یہ براعظم کی اعلی ٹیموں کو اعلی سطح پر مقابلہ کرنے کے لیے ایک پلیٹ فارم فراہم کرتا ہے۔ 2026 کے ایڈیشن میں پنجاب کے بھرپور ہاکی ورثے اور کھیل میں تعاون کو بھی دکھایا جائے گا۔

ہاکی انڈیا کے صدر دلیپ ترکی نے کہا، پنجاب کا ہاکی کا بہت قابل فخر ورثہ ہے اور ہمیں خوشی ہے کہ موہالی اور جالندھر ہیرو مینز ایشین چیمپئنز ٹرافی 2026 کی میزبانی کریں گے۔ ہم حکومت پنجاب کا ان کے تعاون اور حمایت کے لیے شکریہ ادا کرتے ہیں۔

ہاکی انڈیا کے سکریٹری جنرل بھولا ناتھ سنگھ نے کہا کہ ہیرو مینز ایشین چیمپئنز ٹرافی 2026 کی تاریخوں کا اعلان پنجاب میں یادگار ٹورنامنٹ کی طرف ایک اہم قدم ہے۔ ہم حکومت پنجاب اور وزیر اعلی بھگونت مان کے شکر گزار ہیں کہ انہوں نے ہاکی کے تئیں تعاون اور عزم کا اظہار کیا۔ موہالی اور جالندھر کا بھرپور ہاکی کلچر ایشیا کی سرفہرست ٹیموں کے لیے ایک بہترین پلیٹ فارم فراہم کرے گا۔

ہندوستھان سماچار

---------------

ہندوستان سماچار / عبدالسلام صدیقی