کٹھمنڈو، 12 ستمبر (ہ س)۔ نیپال میں تباہ کن سیلاب کا اثر رسوا، نواکوٹ اور دھاڈنگ اضلاع کے تعلیمی نظام پر بھی پڑا ہے۔ سیلاب سے تینوں اضلاع میں 14,455 سے زائد بچوں کی تعلیم متاثر ہوئی ہے۔ وزارتِ تعلیم کے مطابق، ان تینوں اضلاع کے 63 اسکول سیلاب سے متاثر ہوئے ہیں۔

وزارت کے مطابق، سیلاب کے بعد اب بھی 396 طلبہ اور 21 اساتذہ لاپتہ ہیں، جبکہ 20 طلبہ اور دو اساتذہ کی لاشیں برآمد کی جا چکی ہیں۔

وزارتِ تعلیم کی جانب سے موقع پر کیے گئے جائزے کی بنیاد پر تیار کی گئی تعلیمی نقصان سے متعلق رپورٹ کے مطابق، متاثرہ 63 اسکولوں میں 50 سرکاری، 11 نجی اور دو مذہبی تعلیمی ادارے شامل ہیں۔ ان اسکولوں میں مجموعی طور پر 14,455 طلبہ زیر تعلیم تھے۔ بیشتر تعلیمی اداروں میں اب تک معمول کے مطابق کلاسیں شروع نہیں ہو سکی ہیں۔

سیلاب نے 12 تعلیمی اداروں کو مکمل طور پر تباہ کر دیا ہے۔ ان میں آٹھ سرکاری، تین نجی اور ایک مذہبی اسکول شامل ہیں۔ اس کے علاوہ 11 اسکولوں کو جزوی نقصان پہنچا ہے۔ ان میں چھ سرکاری، چار نجی اور ایک مذہبی اسکول شامل ہیں۔ 25 اسکولوں کو ’ہولڈنگ سینٹر‘ کے طور پر استعمال کیا جا رہا ہے۔ ان مراکز میں تقریباً 2,270 بے گھر افراد کو رکھا گیا ہے۔ اس کے باعث ان اسکولوں میں بھی فی الحال تعلیم شروع کرنا ممکن نہیں ہے۔

وزارت کے مطابق، 15 اسکولوں کی عمارتوں کو براہِ راست نقصان نہیں پہنچا، لیکن انسانی نقصان اور دیگر حالات کے باعث وہاں بھی تعلیمی سرگرمیاں شروع نہیں ہو پا رہی ہیں۔

وزارتِ تعلیم کے ترجمان شری پرساد بھٹٹرائی نے کہا کہ سیلاب اور لینڈ سلائیڈنگ سے 23 تعلیمی اداروں کو نقصان پہنچا ہے، جبکہ 25 اسکولوں کو بے گھر شہریوں کے لیے پناہ گاہ کے طور پر استعمال کیا جا رہا ہے۔ انہوں نے بتایا کہ ان اسکولوں میں فوری طور پر تعلیم شروع کرنے کی صورتحال نہیں ہے۔ بے گھر افراد کو دوسری جگہ منتقل کرنے کے لیے مقامی اداروں کے ساتھ رابطہ اور تال میل شروع کر دیا گیا ہے۔

تینوں اضلاع میں سب سے زیادہ تعلیمی نقصان نواکوٹ میں ہوا ہے۔ یہاں 11 اسکول سیلاب سے متاثر ہوئے ہیں، جبکہ 16 اسکولوں کو ہولڈنگ سینٹر کے طور پر استعمال کیا جا رہا ہے۔ ایک اور اسکول کی عمارت کو کوئی نقصان نہیں پہنچا، لیکن اساتذہ اور طلبہ کی غیر موجودگی کے باعث وہاں تعلیم شروع نہیں ہو سکی ہے۔ وزارت کے اعداد و شمار کے مطابق نواکوٹ میں مجموعی طور پر 6,315 طلبہ کی تعلیم متاثر ہوئی ہے۔

اسی طرح دھاڈنگ میں آٹھ اسکول سیلاب سے متاثر ہوئے ہیں، جبکہ دو اسکولوں کو ہولڈنگ سینٹر بنایا گیا ہے۔ مزید چار اسکول تعلیم کے لیے تیار ہیں، لیکن طلبہ کے اسکول نہ پہنچنے کے باعث وہاں بھی کلاسیں شروع نہیں ہو سکی ہیں۔ دھادنگ کے ان تمام متاثرہ اسکولوں میں مجموعی طور پر 5,066 طلبہ زیر تعلیم تھے۔

رسوا ضلع میں چار اسکول سیلاب سے متاثر ہوئے ہیں، جبکہ سات اسکولوں میں بے گھر افراد کو رکھا گیا ہے۔ اس کے علاوہ 10 دیگر اسکولوں میں بھی طلبہ نہیں پہنچ رہے ہیں۔ وزارتِ تعلیم کے مطابق، مجموعی طور پر رسوا میں 3,074 طلبہ کی تعلیم متاثر ہوئی ہے۔

سیلاب سے ہونے والی تباہی کے بعد ان تینوں اضلاع میں تعلیمی نظام کو معمول پر لانے کے لیے اسکولوں کی عمارتوں کی مرمت، بے گھر خاندانوں کی بحالی اور لاپتہ طلبہ و اساتذہ کی تلاش اب ایک بڑا چیلنج بن گئی ہے۔

ہندوستھان سماچار

---------------

ہندوستان سماچار / عبدالواحد