نیویارک، 11 ستمبر (ہ س)۔

قازقستان کی اسٹار ٹینس کھلاڑی ایلینا ریباکینا نے جمعہ کے روز سخت مقابلے میں گھریلو پسندیدہ کوکو گاف کو 6-3، 4-6، 4-6 سے شکست دے کر یو ایس اوپن 2026 خواتین کے سنگلز کے فائنل میں جگہ بنا لی۔ اب خطابی مقابلے میں ان کا سامنا دفاعی چمپئن آریانا سبالینکا سے ہوگا۔ دوسری سیڈڈ ریباکینا اس فتح کے ساتھ یو ایس اوپن کے بعد دنیا کی نئی نمبر ون کھلاڑی بننا یقینی بنا چکی ہیں۔ انہوں نے سبالینکا کو پیچھے چھوڑتے ہوئے سرفہرست درجہ بندی حاصل کی ہے۔ تاہم، اپنا تیسرا گرینڈ سلیم خطاب جیتنے کے لیے انہیں فائنل میں سبالینکا کے چیلنج سے پارپانا ہوگا۔

ریباکینا نے میچ کے بعد کہا، ’’مجھے پہلے سیٹ میں لگا کہ یہ بہت اچھی شروعات تھی اور محض ایک بریک کا فرق تھا، لیکن یقیناً دباو تھا۔ کوکو شاندار کھلاڑی ہیں اور ان کے خلاف کھیلنا ہمیشہ مشکل ہوتا ہے۔ ریلیز کو کنٹرول کرنا بے حد مشکل ہوتا ہے۔ میں نے بس گہری سانس لی اور خود سے مثبت باتیں کیں، تاکہ اچھا ٹینس کھیلنے کی کوشش کرسکوں۔‘‘ گاف نے مقابلے کا آغاز جارحانہ انداز میں کیا اور قازق کھلاڑی پر دباو بنائے رکھا۔ چھٹے گیم میں انہوں نے ریباکینا کی سروس توڑ کر برتری حاصل کر لی اور پہلا سیٹ 3-6 سے اپنے نام کیا۔ دوسرے سیٹ میں گاف کا معیار قدرے کم ہوا اور ان کی چند غلطیوں کا ریباکینا نے فائدہ اٹھایا۔ ریباکینا نے مسلسل دباو بناتے ہوئے سیٹ 4-6 سے جیت لیا اور مقابلے کو فیصلہ کن سیٹ میں پہنچا دیا۔

فیصلہ کن سیٹ میں ریباکینا نے ایک اضافی گیئر حاصل کیا اور سروس بریک کر کے 3-5 کی برتری حاصل کر لی۔ گاف نے فوراً واپسی کرتے ہوئے ان کی سروس توڑی، لیکن ریباکینا نے اگلے گیم میں پھر بریک حاصل کیا اور اپنی سروس برقرار رکھتے ہوئے میچ اپنے نام کر لیا۔گاف کی شکست کے ساتھ اس سال کسی بھی امریکی خاتون یا مرد کھلاڑی کے گرینڈ سلیم فائنل میں پہنچنے کا سلسلہ بھی ختم ہو گیا۔ یہ 2006 کے بعد پہلی بار ہے، جب کسی امریکی کھلاڑی نے سال کے کسی بھی گرینڈ سلیم کے فائنل میں جگہ نہیں بنائی ہے۔

ہندوستھان سماچار

ہندوستان سماچار / انظر حسن