کٹھمنڈو، 10 ستمبر (ہ س)۔ نیپال ایئرلائنز نے حال ہی میں آنے والے سیلاب اور قدرتی آفت سے متاثرہ شہریوں کے لیے بھیجے جانے والے امدادی سامان کی فضائی ترسیل پر خصوصی رعایت دینے کا فیصلہ کیا ہے۔

ایئرلائنز نے اپنی کارپوریٹ سماجی ذمہ داری کے تحت بین الاقوامی اسٹیشنوں سے سیلاب متاثرین کے لیے بھیجے جانے والے امدادی سامان پر عائد مکمل مال برداری کا کرایہ ایک ماہ کے لیے پوری طرح معاف کرنے کا اعلان کیا ہے۔

ایئرلائنز کے مطابق، متعلقہ سفارت خانوں کے ساتھ رابطہ کاری اور سفارت خانے کے سرکاری خط کی بنیاد پر سیلاب متاثرین کے لیے بھیجے جانے والے غذائی اجناس، ادویات، کپڑوں اور دیگر ضروری امدادی سامان کی ترسیل پر مکمل فیس معاف کی جائے گی۔

ایئرلائنز نے اپنے بیان میں کہا ہے کہ آفت کے وقت انسانی امداد کو آسان اور مؤثر بنانے کے لیے کیے گئے اس فیصلے سے مختلف ممالک اور تنظیموں کی جانب سے نیپال بھیجے جانے والے امدادی سامان کو متاثرہ برادریوں تک تیزی سے پہنچانے میں مدد ملے گی۔

ہندوستھان سماچار

---------------

ہندوستان سماچار / عبدالواحد