نئی دہلی، 10 ستمبر (ہ س)۔ مرکزی تفتیشی بیورو (سی بی آئی) نے سنگاپور اسکیم معاملے میں 2013 سے مفرور مطلوب ملزم ہرنیک سنگھ کو امریکہ سے بھارت واپس لانے کے بعد یہاں اندرا گاندھی بین الاقوامی ہوائی اڈے سے گرفتار کر لیا۔ اس کے خلاف ریڈ کارنر نوٹس اور لک آؤٹ سرکلر (ایل او سی) جاری کیا گیا تھا۔ سی بی آئی اسے جلد ہی ہریانہ کے پنچکولہ میں واقع خصوصی جوڈیشل مجسٹریٹ کی عدالت میں پیش کرے گی۔

سی بی آئی نے بتایا کہ اس معاملے میں 2016 میں سازش، دھوکہ دہی، جعل سازی، جعلی دستاویزات کے استعمال اور انفارمیشن ٹیکنالوجی قانون کی متعلقہ دفعات کے تحت ایف آئی آر درج کی گئی تھی۔ تفتیش کے دوران انکشاف ہوا تھا کہ 2013 میں بھارت سے کام کرنے والے جعلساز اسپوفڈ کالز کے ذریعے سنگاپور میں رہنے اور کام کرنے والے ہندوستانی شہریوں سے رابطہ کرتے تھے۔ کال کرنے والے خود کو سنگاپور کے امیگریشن افسر ظاہر کرکے متاثرین کو ڈراتے تھے کہ انہوں نے ہوائی اڈے پر اترتے وقت فارم میں غلط معلومات درج کی ہیں، جس کے باعث ان کے خلاف فوجداری مقدمہ درج کرکے انہیں ملک بدر کیا جا سکتا ہے۔

اس کے بعد متاثرین کو قانونی کارروائی سے بچنے کے لیے مبینہ جرمانے یا سیٹلمنٹ فیس کے نام پر ویسٹرن یونین منی ٹرانسفر کے ذریعے بھارت میں رقم بھیجنے پر مجبور کیا جاتا تھا۔ تفتیش میں یہ بھی ثابت ہوا کہ دھوکہ دہی سے حاصل کی گئی رقم ہرنیک سنگھ اپنے شریک ملزمان آدتیہ بھاردواج اور دیپک جین کے ساتھ مل کر چلائے جا رہے منی ٹرانسفر آؤٹ لیٹ کے ذریعے وصول کرتا تھا۔

جرم کو انجام دینے کے بعد ہرنیک سنگھ مئی 2013 میں ہی بھارت چھوڑ کر فرار ہو گیا تھا اور بعد میں غیر قانونی طور پر امریکہ میں داخل ہو کر ایک دہائی سے زیادہ عرصے تک گرفتاری سے بچتا رہا۔ تاہم، اس کے مفرور رہنے کے دوران ہی پنچکولہ کی خصوصی عدالت میں شریک ملزمان آدتیہ بھاردواج اور دیپک جین کے خلاف مقدمے کی کارروائی مکمل ہوئی اور عدالت نے 26 مئی 2025 کو دونوں کو قصوروار قرار دیا۔

امریکی محکمہ انصاف کے ذریعے امریکہ میں سمن اور ضمانتی وارنٹ کی تعمیل کرائے جانے کے باوجود ہرنیک سنگھ مقدمے کی سماعت کے لیے عدالت میں پیش نہیں ہوا۔ اس کے بعد پنچکولہ کی خصوصی سی بی آئی عدالت نے 22 اپریل 2024 کو اس کے خلاف ناقابل ضمانت وارنٹ جاری کیا تھا۔ اس کے بعد سی بی آئی نے انٹرپول کے ذرائع سے ملزم کے خلاف ریڈ کارنر نوٹس جاری کروایا۔ اس کے خلاف لک آؤٹ سرکلر بھی جاری کروایا گیا تھا۔

ہندوستھان سماچار

---------------

ہندوستان سماچار / عبدالواحد