جموں،09 اگست (ہ س)۔

جموں و کشمیر کے سرکاری اسکولوں میں طلبہ کی حاضری کے نظام کو سخت کرتے ہوئے محکمہ اسکول ایجوکیشن نے دن میں دو مرتبہ حاضری درج کرنے کے احکامات جاری کیے ہیں۔ محکمہ نے واضح کیا ہے کہ ڈیجیٹل حاضری درج کرنے سے قبل طلبہ کی حقیقی موجودگی کی تصدیق لازمی ہوگی۔محکمہ کی جانب سے جاری سرکلر کے مطابق اساتذہ پہلے کلاس میں طلبہ کی جسمانی موجودگی کی تصدیق کریں گے اور اس کے بعد ہی جے کے سمارٹ اٹنڈنس اپلیکیشن پر ڈیجیٹل حاضری درج کی جائے گی۔ جسمانی تصدیق کے بغیر ڈیجیٹل حاضری درج کرنے کی اجازت نہیں ہوگی۔

نئے نظام کے تحت پہلی حاضری اسکول شروع ہونے کے وقت جبکہ دوسری حاضری چھٹی سے قبل درج کی جائے گی۔ اس کے لیے ہر کلاس کا دستی حاضری رجسٹر بھی برقرار رکھنا ہوگا۔ دستی اور ڈیجیٹل حاضری میں فرق پائے جانے کی صورت میں متعلقہ ہیڈ ماسٹر یا ادارے کے سربراہ کو معاملے کی جانچ کرکے ضروری کارروائی کرنا ہوگی۔

محکمہ نے اسکول سربراہان کو حاضری ریکارڈ کی درستگی اور شفافیت یقینی بنانے کا ذمہ دار قرار دیا ہے۔ کلسٹر ہیڈ، زونل ایجوکیشن آفیسر اور چیف ایجوکیشن آفیسر کو اسکولوں کے باقاعدہ اور اچانک معائنے کرنے کی ہدایت بھی دی گئی ہے۔محکمہ کے مطابق جن اسکولوں میں طلبہ کی حاضری کے ریکارڈ میں غیر معمولی رجحان سامنے آئے گا، وہاں خصوصی جانچ کی جائے گی۔ حاضری میں جان بوجھ کر ہیر پھیر کو سنگین انتظامی غفلت تصور کیا جائے گا اور ذمہ دار افراد کے خلاف تادیبی کارروائی کی جاسکتی ہے۔یہ نیا حاضری نظام جموں و کشمیر کے تمام سرکاری اسکولوں میں نافذ ہوگا۔

ہندوستھان سماچار

ہندوستان سماچار / محمد اصغر