گوتھن برگ (سویڈن)، 9 اگست (ہ س)۔ برائن مبیومو کے شاندار گول کی بدولت مانچسٹر یونائیٹڈ نے ہفتے کو پری سیزن دوستانہ میچ میں یورپی چیمپئن پیرس سینٹ جرمین (پی ایس جی) کو 1-1 سے برابری پر روک دیا۔ اولیوی اسٹیڈیم میں کھیلے گئے مقابلے کے ساتھ ہی یونائیٹڈ نے پری سیزن میں اپنا ناقابل شکست رہنے کا سلسلہ جاری رکھا۔

پی ایس جی نے مقابلے کا آغاز انتہائی جارحانہ انداز میں کیا۔ سینیگال کے نوجوان فارورڈ ابراہم مبائے نے میچ کے دوسرے ہی منٹ میں گول کرکے ٹیم کو برتری دلا دی۔ 2026 فیفا ورلڈ کپ میں متاثر کن کارکردگی کا مظاہرہ کرنے والے مبائے نے پی ایس جی کے پہلے ہی موقع کو گول میں تبدیل کرکے یونائیٹڈ پر دباؤ بڑھا دیا۔

یونائیٹڈ کو 20 منٹ کے بعد بڑا جھٹکا لگا، جب میسن ماؤنٹ انجری کے باعث میدان سے باہر ہوگئے۔ اس کے باوجود ٹیم نے دباؤ برداشت کیا اور آدھے گھنٹے کا کھیل مکمل ہونے کے بعد برابری حاصل کرلی۔

ایٹلیٹیکو میڈرڈ کے خلاف گزشتہ میچ میں دو گول کرکے یونائیٹڈ کو 1-2 سے فتح دلانے والے برائن مبیومو نے ایک بار پھر ٹیم کو مشکل صورتحال سے نکالا۔ انہوں نے شاندار فنش کے ساتھ گیند کو جال میں پہنچا کر اسکور 1-1 کردیا۔

اس کے بعد یونائیٹڈ نے مسلسل پی ایس جی پر دباؤ بنایا اور گول پر چھ شاٹس لگائے، جبکہ پی ایس جی کے کھلاڑی صرف دو شاٹس ہی ہدف پر رکھ سکے۔ تاہم، روسی گول کیپر ماتوی سفونوف نے شاندار کارکردگی کا مظاہرہ کرتے ہوئے پانچ اہم سیو کیے اور اپنی ٹیم کو شکست سے بچا لیا۔

مائیکل کیریک کی ٹیم کو اس سے پہلے ریکسہم اے ایف سی کے خلاف شکست کا سامنا کرنا پڑا تھا، لیکن اس کے بعد کے تین مقابلوں میں یونائیٹڈ نے دو فتوحات اور ایک ڈرا حاصل کیا ہے۔ اس طرح ٹیم کا ناقابل شکست سلسلہ تین میچوں تک پہنچ گیا ہے۔

وہیں، پی ایس جی کی گزشتہ جیت مئی میں لینس کے خلاف 0-2 سے ہوئی تھی۔ اس کے بعد ٹیم کو دو شکستوں اور دو ڈرا کا سامنا کرنا پڑا ہے۔

ہندوستھان سماچار

---------------

ہندوستان سماچار / عبدالواحد