علی گڑھ, 09 اگست (ہ س)۔

راجا مہندر پرتاپ سنگھ یونیورسٹی (آر ایم پی ایس یو) میں طلبہ کو نصابی تعلیم کے ساتھ آزادانہ طور پر سوچنے، سوال اٹھانے اور اپنی بات دلیل کے ساتھ رکھنے کا موقع فراہم کرنے کے لیے شعبہ سیاسیات نے ’’فری تھنکرز کلب‘‘ قائم کیا ہے۔ وائس چانسلر پروفیسر نریندر بہادر سنگھ کی رہنمائی میں قائم اس کلب کا مقصد طلبہ میں تنقیدی سوچ، منطقی فہم، عصری معاملات سے واقفیت اور جمہوری شعور کو فروغ دینا ہے۔

کلب کے تحت ہر ہفتے کرنٹ افیئرز کی کلاس کے علاوہ مباحثے، سیمینار، مذاکرے اور مختلف تخلیقی و تعلیمی مقابلے منعقد کیے جائیں گے۔ طلبہ کو تقریری، مضمون نویسی اور بحث و مباحثے کے ذریعے اپنی صلاحیتیں اجاگر کرنے کا موقع ملے گا، جبکہ مقابلہ جاتی امتحانات کی تیاری میں بھی رہنمائی فراہم کی جائے گی۔

وائس چانسلر پروفیسر نریندر بہادر سنگھ نے کہا کہ کلب کا مقصد طلبہ کو محض معلومات یاد کرنے کے بجائے کسی موضوع کو سمجھنے، اس کا تجزیہ کرنے اور مؤثر انداز میں اپنی رائے پیش کرنے کے لیے تیار کرنا ہے۔ مختلف مسائل کو ایک ہی زاویے سے دیکھنے کے بجائے ان کے سماجی، سیاسی اور دیگر پہلوؤں پر گفتگو کی جائے گی۔

شعبہ سیاسیات کے اسسٹنٹ پروفیسر ڈاکٹر کیشو شرما اور گگن پرتاپ سنگھ کلب کی سرگرمیوں میں طلبہ کی رہنمائی کریں گے، جبکہ پروگراموں کو طلبہ کی فعال شرکت سے آگے بڑھایا جائے گا۔ قومی و بین الاقوامی اہمیت کے دنوں پر خصوصی مذاکروں اور سیمینارز کا بھی اہتمام ہوگا۔

کلب کی سرگرمیوں کا آغاز ہفتہ وار کرنٹ افیئرز کلاس سے ہوا، جسے کلب کے رکن تنشک وارشنے نے منعقد کیا۔ اس کے بعد بھارت چھوڑو تحریک کی سالگرہ کے موقع پر ’’جمہوریت میں شہریوں کی شمولیت، بھارت چھوڑو تحریک سے سبق‘‘ کے موضوع پر فکری مذاکرہ ہوا۔ ابھیشیک گوتم، خوشی جادون اور لکشمی شرما نے تاریخی واقعات کو موجودہ جمہوری نظام اور شہری شرکت سے جوڑتے ہوئے اپنے خیالات پیش کیے۔

کلب کی چیئرپرسن پریانشی وارشنے، وائس چیئرپرسن نردوش کمار، سکریٹری ابھیشیک گوتم اور جوائنٹ سکریٹری راشی ورما مقرر کیے گئے ہیں۔

---------------

ہندوستان سماچار / سید کامران علی گڑھ