ممبئی ، 9 اگست (ہ س)۔ مہاراشٹر کے وزیر اعلیٰ دیویندر فڑنویس نے اتوار کو کولہاپور میں پولیس افسران اور اہلکاروں کے لیے تعمیر کیے گئے چھترپتی تارارانی پولیس ہاؤسنگ کمپلیکس کا افتتاح کیا۔ یہ رہائشی منصوبہ مہاراشٹر اسٹیٹ پولیس ہاؤسنگ ویلفیئر کارپوریشن نے تعمیر کیا ہے۔ وزیر اعلیٰ فڑنویس نے بتایا کہ پولیس ہیڈکوارٹر کے احاطے میں تعمیر کیے گئے اس کمپلیکس میں 18 منزلہ دو عمارتیں شامل ہیں۔ ہر عمارت میں 102 فلیٹ ہیں، اس طرح مجموعی طور پر 204 رہائشی یونٹ تعمیر کیے گئے ہیں۔ منصوبے پر تقریباً 71 کروڑ 28 لاکھ روپے خرچ ہوئے ہیں، جبکہ اس کا مجموعی تعمیراتی رقبہ 24 ہزار 101 مربع میٹر ہے۔پولیس اہلکاروں کے لیے تعمیر کیے گئے کمپلیکس میں جدید سہولیات بھی فراہم کی گئی ہیں۔ عمارت کی چھت پر شمسی توانائی کا نظام نصب کیا گیا ہے، جبکہ سیوریج ٹریٹمنٹ پلانٹ، فائر فائٹنگ سسٹم اور دیگر ضروری سہولیات بھی دستیاب کرائی گئی ہیں۔ افتتاحی تقریب میں اسمبلی اسپیکر راہل نارویکر، کولہاپور کے نگراں وزیر و صحت کے وزیر پرکاش آبیتکر، طبی تعلیم کے وزیر حسن مشرف، اعلیٰ و تکنیکی تعلیم کے وزیر چندرکانت دادا پاٹل، کولہاپور خطے کے خصوصی پولیس انسپکٹر جنرل رنجن کمار شرما، ضلع کلکٹر ڈاکٹر وجے راٹھوڑ، ضلع پولیس سپرنٹنڈنٹ نیلوتپل سمیت پولیس اور انتظامیہ کے افسران موجود تھے۔ہندوستھان سماچار

ہندوستان سماچار / جاوید این اے