علی گڑھ, 09 اگست (ہ س)علی گڑھ ڈویژن کے مختلف اضلاع میں ایسے گاؤں کی نشاندہی کی جارہی ہے جن کے موجودہ ناموں کو تبدیل کرنے کی ضرورت محسوس کی جارہی ہے۔ حکومت کی ہدایت پر انتظامیہ ایسے ناموں کا جائزہ لے رہی ہے اور متعلقہ گاؤں کے لیے نام کی تبدیلی کی تجاویز تیار کی جائیں گی۔

محکمہ محصولات کے بورڈ کی ہدایت پر ریاست بھر میں یہ کارروائی شروع کی گئی ہے۔ خاص طور پر ان گاؤں کے ناموں کی جانچ کی جارہی ہے جو درج فہرست ذات کی مختلف ذیلی ذاتوں کے نام سے منسوب ہیں۔ انتظامیہ سے کہا گیا ہے کہ جہاں نام کی تبدیلی مناسب محسوس ہو، وہاں نئے اور موزوں نام کے لیے باقاعدہ تجویز تیار کی جائے۔

اسی سلسلے میں علی گڑھ ڈویژن کے علی گڑھ، ہاتھرس، ایٹا اور کاس گنج اضلاع سے بھی معلومات طلب کی گئی ہیں۔ ڈویژن کے ایڈیشنل کمشنر (فرسٹ) اکھلیش یادو نے چاروں اضلاع کے ضلع مجسٹریٹوں کو خط بھیج کر ضروری کارروائی کرنے کی ہدایت دی ہے۔ خط میں بورڈ آف ریونیو کے کمشنر و سکریٹری کی ہدایات کا حوالہ دیتے ہوئے ہر متعلقہ گاؤں کے لیے الگ تجویز اور واضح رپورٹ تیار کرنے کو کہا گیا ہے۔

انتظامیہ کی جانب سے تیار کی جانے والی رپورٹ میں گاؤں کا موجودہ نام، نام رکھنے کی وجہ اور مقامی سطح پر استعمال ہونے والے نام کی تفصیلات شامل کی جائیں گی۔ اس کے علاوہ اگر کسی گاؤں کے لیے متبادل نام تجویز کیا گیا ہے تو اسے بھی رپورٹ کا حصہ بنایا جائے گا۔

متعلقہ محکموں اور مقامی سطح سے معلومات حاصل کرنے کے بعد ہر گاؤں کی الگ رپورٹ تیار کرکے سفارش کے ساتھ حکومت کو بھیجی جائے گی۔ نام تبدیل کرنے کا حتمی فیصلہ حکومت کی سطح پر ہی کیا جائے گا۔

---------------

ہندوستان سماچار / سید کامران علی گڑھ