سرسا، 9 اگست (ہ س)۔

سرسا کی رکن پارلیمنٹ کماری شیلجا نے کہا ہے کہ ریاست میں قانون و انتظام کی صورتحال مسلسل بگڑتی جا رہی ہے۔ قتل، لوٹ مار، تاوان اور فائرنگ جیسے واقعات نے عام شہریوں میں عدم تحفظ کا ماحول پیدا کر دیا ہے۔ حکومت کو سیاسی بیان بازی اور قانون و انتظام بہتر ہونے کے دعووں کے بجائے زمینی سطح پر جرائم کی روک تھام کے لیے مو¿ثر اقدامات کرنے چاہئیں۔

شیلجا نے اتوار کو جاری ایک بیان میں کہا کہ ریاست میں جرائم پیشہ افراد کے حوصلے اس قدر بلند ہو چکے ہیں کہ وہ دن دہاڑے سنگین وارداتوں کو انجام دینے سے بھی نہیں ہچکچا رہے ہیں۔ فتح آباد اور پانی پت میں بھی اس طرح کے سنگین مجرمانہ واقعات سامنے آ چکے ہیں۔

رکن پارلیمنٹ نے کہا کہ چند روز قبل روہتک میں پولیس تھانے کے سامنے کانگریس رکن اسمبلی بلرام ڈانگی کے دفتر پر موٹر سائیکل سوار بدمعاشوں کی جانب سے مبینہ طور پر اندھا دھند فائرنگ کا واقعہ سامنے آیا تھا۔ پولیس تھانے کے سامنے عوامی نمائندے کے دفتر پر اس طرح کی واردات ہونا اپنے آپ میں انتہائی سنگین معاملہ ہے۔

انہوں نے کہا کہ جب عوامی نمائندے، تاجر اور دکاندار تک خود کو محفوظ محسوس نہیں کر رہے ہیں تو عام خاندانوں کی سلامتی کو لے کر تشویش ہونا فطری ہے۔ شیلجا نے کہا کہ ریاست کے عوام کی جان و مال کی حفاظت حکومت کی اولین آئینی ذمہ داری ہے۔

شیلجا نے کہا کہ وزیر اعلیٰ اور حکومت محض اعداد و شمار اور دعووں کی بنیاد پر قانون و انتظام کو بہتر قرار نہیں دے سکتے۔ حکومت کو زمینی حقیقت کو تسلیم کرتے ہوئے پولیس نظام کو مضبوط بنانا چاہیے اور سنگین جرائم میں ملوث مجرموں اور گروہوں کے خلاف مو¿ثر مہم چلانی چاہیے۔

ہندوستھان سماچار

ہندوستان سماچار / عطاءاللہ