یوجین، اوریگن ، 8 اگست (ہ س)۔ ہندوستان کی پوجا نے جمعہ کو عالمی انڈر-20 ایتھلیٹکس چیمپئن شپ کے تیسرے دن خواتین کی ہائی جمپ کے فائنل میں جگہ بنا لی۔ قومی ریکارڈ اپنے نام رکھنے والی پوجا نے 1.79 میٹر کی بہترین چھلانگ لگا کر تمغے کے مرحلے میں داخلہ حاصل کیا۔

براہ راست کوالیفکیشن کے لیے 1.84 میٹر کا معیار مقرر تھا، لیکن کوئی بھی ایتھلیٹ اسے پار نہیں کر سکی۔ ایسے میں 1.79 میٹر کی بہترین چھلانگ لگانے والی تمام 12 ایتھلیٹ فائنل میں پہنچ گئیں۔

اسی سال ہریانہ کی اس نوجوان ایتھلیٹ نے ایشیائی انڈر-20 ایتھلیٹکس چیمپئن شپ میں 1.93 میٹر کی چھلانگ لگا کر 14 سال پرانا سینئر قومی ریکارڈ توڑ دیا تھا۔ یہ ریکارڈ پہلے سہانا کماری کے نام تھا۔ پوجا نے اس مقابلے میں سونے کا تمغہ بھی جیتا تھا۔

مردوں کی لانگ جمپ میں ہندوستان کے شاہنواز خان اور آر سی جتن ارجنن نے بھی فائنل میں جگہ بنا لی۔ دونوں کھلاڑی براہ راست کوالیفکیشن کے لیے مقرر 7.75 میٹر کا معیار حاصل نہیں کر سکے، لیکن ٹاپ-12 میں رہنے کی وجہ سے تمغے کے مرحلے میں پہنچ گئے۔

شاہنواز نے 7.73 میٹر کی بہترین چھلانگ لگا کر گروپ-اے میں چوتھا اور مجموعی طور پر پانچواں مقام حاصل کیا۔ وہیں جتن ارجنن نے 7.57 میٹر کی چھلانگ کے ساتھ گروپ-اے میں ساتواں اور مجموعی طور پر 12واں مقام حاصل کیا۔

قواعد کے مطابق 7.75 میٹر کا براہ راست کوالیفکیشن معیار حاصل کرنے والے یا دونوں گروپوں میں مجموعی ٹاپ-12 میں رہنے والے ایتھلیٹ فائنل کے لیے کوالیفائی کرتے ہیں۔

خواتین کی بھالا پھینک مقابلے میں ہندوستان کی پونم معمولی فرق سے فائنل میں جگہ بنانے سے محروم رہ گئیں۔ ان کی بہترین کوشش 48.81 میٹر رہی، جس کے ساتھ وہ مجموعی طور پر 13ویں مقام پر رہیں۔

فائنل میں پہنچنے کے لیے مقرر براہ راست کوالیفکیشن معیار 52.50 میٹر تھا۔ آخری کوالیفکیشن مقام حاصل کرنے والی نیدرلینڈز کی جولی بارویلڈٹ نے 49.08 میٹر کی بہترین کوشش کی اور پونم سے آگے نکل گئیں۔

ہندوستھان سماچار

---------------

ہندوستان سماچار / انظر حسن