علی گڑھ, 08 اگست (ہ س)۔

بچوں میں کم عمری سے ہی ماحولیاتی شعور پیدا کرنے کے مقصد سے علی گڑھ مسلم یونیورسٹی کے ایس ٹی ایس اسکول کی این سی سی اکائی نے ملک گیر ‘ایک پیڑ ماں کے نام’ مہم کے تحت اسکول کے احاطے میں شجرکاری مہم منعقد کی۔ اس پروگرام نے ماحول کے تئیں ذمہ دار اور سماجی شعور رکھنے والے نوجوان شہریوں کی تربیت پر یونیورسٹی کے اسکولوں کی مسلسل توجہ کو اجاگر کیا۔

شجرکاری مہم میں ایس ٹی ایس اسکول کے پرنسپل جناب فیصل نفیس، نائب پرنسپل ڈاکٹر محمد عالمگیر، ڈاکٹر نسیم احمد اور جناب محمد عدنان خان کے علاوہ این سی سی کیڈٹس نے شرکت کی۔

این سی سی کیڈٹس نے پودے لگانے کے عمل میں حصہ لیا اور ان کے تحفظ اور نگہداشت کا عہد کیا۔ کیڈٹس سے خطاب کرتے ہوئے پرنسپل جناب فیصل نفیس نے انہیں ماحولیاتی تحفظ کے ذمہ دار سفیر بننے کی تلقین کی۔ انہوں نے زور دیا کہ پودے لگانا محض آغاز ہے، جبکہ اسے باقاعدگی سے پانی دینا، اس کا تحفظ کرنا اور اس کی نگہداشت کرنا بھی اتنا ہی اہم ہے۔ شجرکاری مہم نے بچوں کی تربیت کے ابتدائی مرحلے میں ماحولیاتی اقدار پروان چڑھانے میں اسکولی تعلیم کے اہم کردار کو اجاگر کیا۔

---------------

ہندوستان سماچار / سید کامران علی گڑھ