نئی دہلی، 07 اگست (ہ س)۔ نوجوانوں کے امور اور کھیل-کود کے مرکزی وزیر ڈاکٹر منسکھ مانڈویا نے جمعہ کے روز نیشنل اسپورٹس فیڈریشن (این ایس ایف) کانکلیو-2026 میں کھلاڑیوں کے مفادات کو اولین ترجیح دینے، انتخاب کے عمل میں مکمل شفافیت کو یقینی بنانے اور کھیلوں کی انتظامیہ میں جامع اصلاحات پر زور دیا۔

انہوں نے کہا کہ کسی بھی کھلاڑی کے ساتھ کسی قسم کی ناانصافی نہیں ہونی چاہیے اور انتخاب کا عمل منصفانہ، جوابدہ اور مکمل شفاف ہونا چاہیے۔ اجلاس میں نیشنل اسپورٹس ایڈمنسٹریشن ایکٹ 2025 کی تعمیل، اچھی طرز حکمرانی ، ایتھلیٹ ویلفیئر اور ایشین گیمز 2026، لاس اینجلس اولمپکس 2028 اور دولت مشترکہ کھیلوں 2030 کی تیاریوں کا جائزہ لیا گیا۔

میٹنگ سے خطاب کرتے ہوئے ڈاکٹر مانڈویا نے کہا کہ ”یہ ہماری ذمہ داری ہے کہ ہم اس بات کو یقینی بنائیں کہ کسی بھی کھلاڑی کے ساتھ کبھی کسی قسم کی ناانصافی نہ ہو، ناانصافی کئی شکلوں میںہو سکتی ہے اور جہاں بھی ایسی صورت حال پیدا ہوتی ہے، اسے انتہائی سنجیدگی کے ساتھ نمٹا جانا چاہیے۔“ انہوں نے انتخابی عمل میں شفافیت پر زور دیتے ہوئے کہا کہ ”کھلاڑیوں کے انتخاب کے لیے اوپن ٹرائلز کیمروں کی نگرانی میں اور مبصرین کی موجودگی میں منعقد کیے جائیں۔ انتخابی عمل کی شفافیت پر کسی بھی طرح سمجھوتہ نہیں کیا جا سکتا“۔

ڈوپنگ کے معاملے پر ڈاکٹرمانڈویا نے کہا کہ ہندوستان کو اجتماعی طور پر اس چیلنج سے نمٹنا ہوگا اور موجودہ نظام کو مضبوط بنانے کی ضرورت۔ انہوں نے کہا، ”ہمیں ڈوپنگ کے مسئلے سے مل کر نمٹنا ہوگا۔ صرف کھلاڑیوں کے خلاف کارروائی کرنا کافی نہیں ہے۔ ممنوعہ اشیا تیار کرنے، سپلائی کرنے، فراہم کرنے اور استعمال کرنے والوں کی پوری چین کی نشاندہی کی جانی چاہیے اور ایک شفاف اور مضبوط نظام کے تحت کارروائی کی جانی چاہیے۔ تب ہی کھیلوں سے ڈوپنگ کو موثر طریقے سے ختم کیا جا سکتا ہے۔“

انہوں نے یہ بھی کہا کہ ملک کو غیر ملکی کوچز پر بہت زیادہ انحصار کرنے کے بجائے ایک مضبوط ہندوستانی کوچنگ سسٹم تیار کرنا چاہئے۔ کھلاڑیوں کی تربیت میں بھی یکساں سرمایہ کاری کرنے کی ضرورت ہے۔ انہیں معیاری تربیت اور بین الاقوامی نمائش فراہم کرنا ضروری ہے۔ صرف ایک اچھی تربیت یافتہ کوچ ہی ملک کے لیے عالمی معیار کے کھلاڑی پیدا کر سکتا ہے۔

مرکزی وزیر کھیل -کودنے کہا کہ مرکزی حکومت نیشنل اسپورٹس ایڈمنسٹریشن ایکٹ-2025 کی موثر تعمیل، کھیلوں کی فیڈریشنوں میں اچھی حکمرانی اور آئندہ ایشیائی کھیلوں، اولمپکس اور دولت مشترکہ کھیلوں کی تیاریوں کو مضبوط بنانے کے لیے قومی کھیلوں کی فیڈریشنوں کے ساتھ مل کر کام کرتی رہے گی۔

مرکزی وزیر مملکت برائے کھیل -کود رکشا کھڈسے، وزارت کھیل کے سینئر افسران، اسپورٹس اتھارٹی آف انڈیا (سائی) اور مختلف قومی کھیلوں کی فیڈریشنوں کے نمائندے اس کانکلیو میں موجود تھے۔

ہندوستھان سماچار

ہندوستان سماچار / محمد شہزاد