علی گڑھ, 07 اگست (ہ س)۔

تعلیمی اور صنعتی شہر علی گڑھ میں سیاحت کے فروغ اور اس کی بے پناہ امکانات کو عملی شکل دینے کے مقصد سے علی گڑھ ہوٹل اینڈ ریسٹورنٹ ایسوسی ایشن کے زیر اہتمام آج 8 اگست (ہفتہ) کو ہوٹل فورچون میں ایک عظیم الشان سیاحتی ترقی سیمینار، حلف برداری اور اعزازی تقریب منعقد ہوگی، جس میں شہر کی سیاحتی ترقی کے لیے اہم تجاویز اور منصوبوں پر غور کیا جائے گا۔

اس سلسلے میں منعقدہ تیاری اجلاس میں ایسوسی ایشن کے صدر مانو مہاجن نے بتایا کہ پروگرام میں علی گڑھ کی سیاحتی ترقی کو نئی رفتار دینے کے لیے مختلف شعبوں کے ماہرین، سرکاری افسران، عوامی نمائندوں اور صنعت و ہوٹل کاروبار سے وابستہ افراد ایک پلیٹ فارم پر جمع ہوں گے۔

اجلاس کی صدارت کرتے ہوئے چیئرمین ڈاکٹر پنکج دھیرج نے کہا کہ اس موقع پر علی گڑھ کی ہمہ جہت سیاحتی ترقی، مرکزی و ریاستی حکومت کی سیاحتی پالیسیوں، متھرا اور آگرہ سے علی گڑھ جنکشن کو ریلوے ٹریک کے ذریعے جوڑنے اور برج ٹورازم سرکٹ (متھرا-ورنداون) سے علی گڑھ کو منسلک کرنے جیسے اہم اور طویل عرصے سے زیر التوا مطالبات پر تفصیلی تبادلۂ خیال ہوگا۔

ایسوسی ایشن کے جنرل سکریٹری وویک بگائی نے بتایا کہ پروگرام دو اجلاسوں پر مشتمل ہوگا۔ پہلا اجلاس دوپہر 1:30 بجے شروع ہوگا، جبکہ دوسرا اجلاس دوپہر 2:30 بجے منعقد ہوگا۔ پروگرام میں محکمہ سیاحت، محکمہ صنعت، اے ڈی اے، نگر نگم، محکمہ فائر، پولیس انتظامیہ کے اعلیٰ افسران، عوامی نمائندے اور مختلف سماجی و تجارتی تنظیموں کے عہدیداران شرکت کریں گے۔

تیاری اجلاس میں دیپک گرگ، اکھل گپتا، پرمیت گپتا، سردار منمیت سنگھ، پردیپ سنگھل اور راغو اُپادھیائے سمیت دیگر معززین بھی موجود تھے۔

---------------

ہندوستان سماچار / سید کامران علی گڑھ