نئی دہلی، 07 اگست (ہ س):۔

دہلی اسمبلی کے اسپیکر وجیندر گپتا نے جمعہ کے روز ایوان کی کارروائی کے آغاز میں اعلان کیا کہ دہلی اسمبلی نے ڈیجیٹل انڈیا بھاشنی ڈویژن کو ایوان کی کارروائی کے دوران اپنی مصنوعی ذہانت (اے آئی) پر مبنی لائیو ٹرانسکرپشن (براہِ راست تحریری نقل) اور ترجمہ نظام کے پائلٹ ٹرائل کے لیے مدعو کیا ہے۔ اس اقدام کا مقصد جدید ٹیکنالوجی کے استعمال کے ذریعے قانون سازی کے عمل میں کارکردگی، شفافیت اور پیداواری صلاحیت کو بہتر بنانے کے امکانات کا جائزہ لینا ہے۔

وجیندر گپتا نے بتایا کہ بھاشنی کا آغاز وزیر اعظم نے جولائی 2022 میں گجرات کے گاندھی نگر میں منعقدہ ڈیجیٹل انڈیا ہفتہ کے دوران کیا تھا۔ یہ قومی زبان ترجمہ مشن ہے۔ جس کا مقصد ملک کے ہر شہری کو اس کی پسندیدہ بھارتی زبان میں ڈیجیٹل عوامی خدمات اور انٹرنیٹ تک آسان رسائی فراہم کرنا ہے۔ مصنوعی ذہانت پر مبنی یہ پلیٹ فارم کثیر لسانی حکمرانی کو مضبوط بنانے اور ڈیجیٹل شمولیت کو فروغ دینے میں اہم کردار ادا کر رہا ہے۔

انہوں نے کہا کہ ملک کے کسی بھی قانون ساز ایوان میں بھاشنی کے لائیو ٹرانسکرپشن اور ترجمہ نظام کا یہ پہلا آزمائشی عمل ہے۔ یہ اقدام دہلی اسمبلی کے جدید اختراعات اور جدید ترین ٹیکنالوجی اپنانے کے عزم کی عکاسی کرتا ہے، تاکہ مستقبل میں ایوان کی کارروائی کو مزید مو¿ثر، شفاف اور عوام کے لیے قابلِ رسائی بنایا جا سکے۔

وجیندر گپتا نے بتایا کہ یہ پائلٹ ٹرائل مکمل طور پر جائزہ پر مبنی ہوگا۔ ٹرانسکرپشن کے معیار اور پورے نظام کی کارکردگی کا تفصیلی جائزہ لیا جائے گا، جبکہ آزمائش کے دوران سامنے آنے والی تمام تجاویز اور تکنیکی چیلنجز کو دور کیا جائے گا۔ موصول ہونے والے فیڈبیک کی بنیاد پر نظام کو دہلی اسمبلی کی ضروریات کے مطابق مزید بہتر اور مو¿ثر بنایا جائے گا۔

انہوں نے امید ظاہر کی کہ اگر یہ پائلٹ ٹرائل کامیاب رہا تو دہلی اسمبلی اپنی دیگر انتظامی شاخوں میں بھی اسی نوعیت کے اے آئی پر مبنی حل اختیار کرنے پر غور کرے گی، جس سے اسمبلی کی مجموعی کارکردگی مزید جدید اور ٹیکنالوجی سے ہم آہنگ ہو سکے گی۔

ہندوستھان سماچار

ہندوستان سماچار / عطاءاللہ