جموں،07 اگست(ہ س)۔

جموں و کشمیر کے وزیر اعلیٰ عمر عبداللہ نے جموں شہر اور ملحقہ علاقوں میں ہاؤسنگ و شہری ترقی کے شعبے کے تحت 60 کروڑ روپے سے زائد مالیت کے مختلف ترقیاتی منصوبوں کا افتتاح اور سنگ بنیاد رکھا۔ اس موقع پر انہوں نے کہا کہ حکومت پائیدار، جدید اور عوام دوست شہری بنیادی ڈھانچے کی تعمیر کے لیے سنجیدگی سے کام کر رہی ہے۔

وزیر اعلیٰ نے 28 کروڑ روپے سے زائد لاگت کے نئے منصوبوں کا سنگ بنیاد رکھا جبکہ تقریباً 32 کروڑ روپے کی لاگت سے مکمل ہونے والے منصوبوں کا افتتاح کیا۔ ان میں بھگوتی نگر میں 23.04 کروڑ روپے کی لاگت سے 100 برقی بسوں کے لیے ڈپو کی تعمیر، کٹرا کے تان تالاب کنڈروریان نالے کی بحالی، بھگوتی نگر میں 11 کروڑ روپے کی لاگت سے تعمیر شدہ ویسٹ ٹو ونڈر پارک، 15.74 کروڑ روپے کے ہیریٹیج ٹریل و خوبصورتی سازی منصوبے، باہو قلعہ فوڈ اسٹریٹ کی جدید کاری اور اکھنور میں 3.61 کروڑ روپے کی لاگت سے تعمیر شدہ شاپنگ و میونسپل کمپلیکس شامل ہیں۔

تقریب سے خطاب کرتے ہوئے عمر عبداللہ نے کہا کہ دریائے توی کے کنارے قائم کیا گیا ویسٹ ٹو ونڈر پارک جموں کے لیے ایک اہم سیاحتی مرکز بن سکتا ہے۔ انہوں نے کہا کہ برقی بسوں کے ڈپو کی تعمیر سے شہر میں ماحول دوست عوامی نقل و حمل کو فروغ ملے گا، جبکہ دیگر منصوبے شہری سہولیات، سیاحت، ثقافتی ورثے کے تحفظ اور عوامی خدمات میں بہتری لائیں گے۔

وزیر اعلیٰ نے کہا کہ سیاسی حالات جیسے بھی ہوں، ترقیاتی عمل متاثر نہیں ہونا چاہیے۔ انہوں نے یقین دلایا کہ حکومت مالی مشکلات کے باوجود جموں و کشمیر کے تمام علاقوں میں بلاامتیاز ترقیاتی منصوبوں پر عمل درآمد جاری رکھے گی اور عوام کی فلاح و بہبود کو اولین ترجیح دے گی۔

اس موقع پر نائب وزیر اعلیٰ سریندر کمار چودھری، وزیر اعلیٰ کے مشیر ناصر اسلم وانی، متعدد اراکین اسمبلی اور اعلیٰ انتظامی افسران بھی موجود تھے۔

ہندوستھان سماچار

ہندوستان سماچار / محمد اصغر