۔ ریاست کی ہمہ جہت ترقی کے لیے 32,070 کروڑ روپے کے منصوبوں اور تجویزوں کو منظوری
بھوپال، 04 اگست (ہ س)۔ مدھیہ پردیش میں وزیر اعلیٰ ڈاکٹر موہن یادو کی صدارت میں منگل کو منترالیہ میں ہوئی کابینہ کی میٹنگ میں کسانوں کے مفاد میں بڑا فیصلہ لیا گیا۔ میٹنگ میں تعاون کے شعبے (کوآپریٹو ڈپارٹمنٹ) کی ’’کوچ یوجنا‘‘ کو منظوری دی گئی۔ اس کے ساتھ ہی ریاست کی ہمہ جہت ترقی کو رفتار دینے کے لیے کل 32,070 کروڑ روپے کے منصوبوں اور تجویزوں کو منظوری فراہم کی گئی۔
عوامی تعمیرات (پی ڈبلیو ڈی) کے وزیر راکیش سنگھ نے میٹنگ میں لیے گئے فیصلوں کی معلومات دیتے ہوئے بتایا کہ کابینہ نے کوآپریٹو ڈپارٹمنٹ کی ’’کوچ یوجنا‘‘ کی توثیق کی۔ یہ منصوبہ کوآپریٹو سوسائٹیوں کے ایسے تقریباً پانچ ہزار کسانوں کے لیے ہے، جن کے قرض کھاتوں میں گڑبڑیاں ہوئی ہیں اور جانچ میں تاخیر کی وجہ سے کسان سرکاری اسکیموں کا فائدہ نہیں اٹھا پا رہے ہیں۔ اب ایسے کسانوں کو اہم دھارے میں لا کر اسکیم کے تحت نیا قرض مل سکے گا۔ فیصلے کے مطابق متاثرہ کسانوں کو راحت دینے کے لیے اپیکس بنک اور ضلع کوآپریٹو بنکوں کے ذریعے اپنے سطح سے 50 کروڑ روپے کی حد تک کا فنڈ تیار کیا جائے گا۔ ریاستی حکومت بھی کسانوں کے مفاد میں 25 کروڑ روپے کا ایک بارگی امدادی فنڈ فراہم کرے گی۔
انہوں نے بتایا کہ مجلسِ وزراء نے مدھیہ پردیش کی ہمہ جہت ترقی اور عوامی فلاح کو رفتار دینے کے لیے کل 32,070 کروڑ روپے کے منصوبوں اور تجویزوں کو منظوری فراہم کی۔ میٹنگ میں آنے والے مالی سالوں 1 اپریل 2026 سے 31 مارچ 2031 کے لیے صحت کے شعبے کو ترجیح دیتے ہوئے ضلع و سول اسپتالوں اور دواخانوں کے باقاعدہ نظامِ العمل کے لیے 12 ہزار 517.99 کروڑ روپے، بنیادی دیکھ بھال برائے صحت کی رسائی بڑھانے کے لیے 11 ہزار 812.02 کروڑ روپے، پردھان منتری آیوشمان بھارت ہیلتھ انفراسٹرکچر مشن (پی ایم - ابھیم) کے تحت صحتی آفات سے نمٹنے اور لیب نیٹ ورک کی تعمیر کے لیے 2,449 کروڑ روپے نیز ملیریا اور ویکٹر سے پھیلنے والی بیماریوں کے موثر روکتھام کے لیے 1,705 کروڑ روپے کی منظوری دی گئی۔
وزیر راکیش سنگھ نے بتایا کہ قبائلی امور کے شعبے کے تعلیمی کیڈر کے اسسٹنٹ ٹیچر اور ہائی اسکول ٹیچر نیز نئے تعلیمی کیڈر کے پرائمری اور مڈل اساتذہ کے لیے مروجہ کرمونت اسکیم کے مطابق چوتھا کرمونت پے اسکیل 1 جولائی 2023 یا اس کے بعد کی تاریخ سے 35 سال کی سروس مکمل کرنے پر نافذ کیے جانے کی منظوری دی گئی۔ اس فیصلے کا فائدہ 6846 اساتذہ کو ملے گا۔
انہوں نے بتایا کہ مجلسِ وزراء نے محکمہ اسپورٹس اور یوتھ ویلفیئر کے تحت اسٹیڈیم اور اسپورٹس انفراسٹرکچر اسکیم کے مالی سال 27-2026 سے مالی سال 31-2030 تک نفاذ کے لیے 2,460 کروڑ 57 لاکھ روپے کی منظوری دی ہے۔ اس سے ریاست کے کھلاڑیوں کو بین الاقوامی اور قومی سطح کا کھیلوں کا بنیادی ڈھانچہ دستیاب کرایا جائے گا نیز موجودہ ڈھانچے کو اپ گریڈ کیا جائے گا۔ ساتھ ہی کھلاڑیوں کے لیے ضروری مستقل قسم کے کھیلوں کے سامان نصب کرائے جائیں گے۔ ریاست کے ضلع ہیڈ کوارٹروں پر اسٹیڈیم / اسپورٹس ٹریننگ سینٹر تعمیر شدہ ہیں اور 313 ڈویلپمنٹ بلاکس میں سے تقریباً 100 مقامات پر اسٹیڈیم تعمیر کیے جا چکے ہیں۔
مجلسِ وزراء نے ریاست کے ضلع اور سول اسپتالوں نیز دواخانوں کو 01 اپریل 2026 سے 31 مارچ 2031 تک چلانے کے لیے 12 ہزار 517.99 کروڑ روپے کی منظوری دی ہے۔ اسکیم سے ضلع اسپتالوں میں مریضوں کو بہتر صحتی سہولیات اور اسپتالوں کو باقاعدگی سے چلایا جا سکے گا۔ اسکیم کو چلانے کا مقصد خاندانی فلاح و بہبود کے پروگرام اور شعبے کی جانب سے چلائی جانے والی سرگرمیوں بالخصوص صحت کے تئیں بیداری لانا بھی ہے۔
اس کے ساتھ ہی مجلسِ وزراء نے ملیریا سمیت دیگر ویکٹر سے پھیلنے والی بیماریوں کے روکتھام سے متعلق اسکیم کے 1 اپریل 2026 سے 31 مارچ 2031 تک نفاذ کے لیے 1,704 کروڑ 81 لاکھ روپے کی منظوری فراہم کی ہے۔ اس قومی پروگرام کے تحت ملیریا سمیت دیگر ویکٹر والی بیماریوں کو کنٹرول کیا جاتا ہے، جس میں نئے کیڑے مار ادویات اور لاروا کش ادویات شامل ہیں۔
وزیر راکیش سنگھ نے بتایا کہ مجلسِ وزراء نے ریاست میں پردھان منتری آیوشمان بھارت ہیلتھ انفراسٹرکچر مشن (پی ایم - ابھیم) کے 1 اپریل 2026 سے 31 مارچ 2031 تک مسلسل نفاذ کے لیے 2,448 کروڑ 79 لاکھ روپے کی منظوری دی ہے۔ اس اسکیم کے تحت ضلع اسپتال اور میڈیکل کالج کی سطح پر کریٹیکل کیئر بلاک اور انٹیگریٹڈ پبلک ہیلتھ لیب کی تعمیر کی جائے گی نیز بلاک سطح پر بلاک پبلک ہیلتھ یونٹ کا قیام یقینی بنایا جائے گا۔
اس کے علاوہ مجلسِ وزراء نے اضلاع میں صحتی سہولیات کی رسائی بڑھانے، بنیادی دیکھ بھال برائے صحت یقینی بنانے اور بہتر صحتی نگرانی کے لیے ہیلتھ سینٹروں کے قیام و نگہداشت (بنیادی) سے متعلق اسکیم کے 1 اپریل 2026 سے 31 مارچ 2031 تک مسلسل نفاذ کے لیے 11 ہزار 812.02 کروڑ روپے کی منظوری دی ہے۔
وزیر راکیش سنگھ نے بتایا کہ مجلسِ وزراء نے سائنس اور ٹیکنالوجی ڈپارٹمنٹ کے اسٹیٹ ڈیٹا سینٹر کی اپ گریڈیشن، آپریشن اور دیکھ بھال سے متعلق اسکیم کے 1 اپریل 2026 سے 31 مارچ 2031 تک مسلسل نفاذ کے لیے 1,099 کروڑ 58 لاکھ روپے کی منظوری دی ہے۔
ہندوستھان سماچار
---------------
ہندوستان سماچار / انظر حسن
