کٹھمنڈو، 31 اگست (ہ س)۔ رسوا کی بھوٹے کوشی ندی میں سیلاب آنے کے بعد متاثرہ رسواگڑھی پن بجلی پروجیکٹ کی سرنگ کے اندر تلاش کے لیے پہنچی نیپالی فوج کی قیادت والی امدادی ٹیم کو کوئی بھی زندہ یا مردہ شخص نہیں ملا۔ اس کے بعد امدادی ٹیم واپس لوٹ گئی۔ پن بجلی پروجیکٹ کی جانب سے بتایا گیا تھا کہ اس سرنگ میں 93 افراد پھنسے ہوئے ہیں۔

سرنگ کے آخری حصے میں لوگوں کے پھنسے ہونے کے خدشے کے بعد نیپالی فوج کی ٹیم انجینئروں اور ڈرون ٹیم کے ساتھ مل کر تلاش کے کام میں مصروف تھی۔ امدادی ٹیم سرنگ کے آخری مقام تک پہنچی اور ڈرون کے ذریعے بھی وسیع پیمانے پر تلاشی لی، لیکن وہاں کسی زندہ شخص کی موجودگی یا کسی مردہ شخص کی لاش کے کوئی آثار نہیں ملے۔

سرنگ کے اندر کسی شخص کے موجود نہ ہونے کی تصدیق کے بعد نیپالی فوج نے اپنی بچاؤ کاروائی ختم کر دی اور ٹیم رسوا کے دھُنچے واپس لوٹ گئی۔ اس پن بجلی منصوبے کی جانب سے حکومت کو اطلاع دی گئی تھی کہ سرنگ میں 93 افراد پھنسے ہوئے ہیں۔ سرنگ کے اندر کئی فٹ تک ملبہ جمع ہونے کی وجہ سے بچاؤ کارروائی میں کافی مشکلات کا سامنا کرنا پڑا۔

ہندوستھان سماچار

---------------

ہندوستان سماچار / عبدالواحد