چنڈی گڑھ، 3 اگست (ہ س)۔

پنجاب و ہریانہ ہائی کورٹ نے پنجاب حکومت کو بڑا جھٹکا دیتے ہوئے تقریباً چھ لاکھ سرکاری ملازمین اور پنشن یافتگان کا بقایا مہنگائی الاؤنس (ڈی اے) پندرہ دن کے اندر ادا کرنے کا حکم دیا ہے۔

عدالت نے ریاستی حکومت کی لیٹرز پیٹنٹ اپیل مسترد کرتے ہوئے سنگل بنچ کے سابقہ فیصلے کو برقرار رکھا۔

اس حکم پر عمل درآمد سے پنجاب حکومت پر تقریباً 14,191 کروڑ روپے کا مالی بوجھ پڑنے کا اندازہ ہے۔ عدالت نے ریاست کے چیف سکریٹری کو بھی ہدایت دی ہے کہ ادائیگی مکمل ہونے کے بعد حلف نامہ داخل کرکے حکم پر عمل درآمد کی اطلاع دیں۔

عدالت نے یہ بھی حکم دیا کہ بقایا رقم کی ادائیگی تک پنجاب حکومت بڑے تشہیری مہمات اور غیر ضروری اسکیموں پر اخراجات نہیں کرے گی۔حکم کے مطابق اگر مقررہ مدت میں ادائیگی نہ کی گئی تو بقایا رقم پر سالانہ 6 فیصد سود بھی عائد کیا جا سکتا ہے۔

یہ معاملہ ریاستی ملازمین اور پنشن یافتگان کو آل انڈیا سروسز اور عدالتی افسران کے برابر شرح پر مہنگائی الاؤنس دینے سے متعلق ہے۔ اس سے قبل سنگل بنچ نے حکومت کو بقایا ڈی اے اور مہنگائی ریلیف ادا کرنے کا حکم دیا تھا، تاہم ریاستی حکومت نے یہ کہتے ہوئے فیصلے کو چیلنج کیا تھا کہ سنگل بنچ کو ایسا حکم جاری کرنے کا اختیار حاصل نہیں تھا۔

فیصلے کے بعد سیاسی ردعمل بھی سامنے آیا۔ کانگریس کے رکن اسمبلی پرگٹ سنگھ نے عدالتی حکم کا خیر مقدم کرتے ہوئے حکومت کی مالی ترجیحات پر سوال اٹھایا۔ انہوں نے کہا کہ دیگر منصوبوں کے لیے فنڈز دستیاب ہیں، لیکن ملازمین اور پنشن یافتگان کا جائز بقایا طویل عرصے سے روکا گیا تھا۔

رکن اسمبلی منپریت سنگھ ایالی نے بھی فیصلے کا خیر مقدم کرتے ہوئے کہا کہ یہ معاملہ پنجاب اسمبلی میں اٹھایا جائے گا۔ انہوں نے حکومت سے عدالت کے حکم پر عمل کرتے ہوئے بقایا رقم جلد جاری کرنے کا مطالبہ کیا۔

برسرِ اقتدار عام آدمی پارٹی کے رکن اسمبلی منویندر سنگھ گیاسپورہ نے کہا کہ پنجاب حکومت ملازمین اور پنشن یافتگان کے ساتھ کھڑی ہے۔ انہوں نے امید ظاہر کی کہ وزیر اعلیٰ بھگونت مان عدالت کی ہدایات کے مطابق ادائیگی کا مناسب حل نکالیں گے۔

ہندوستھان سماچار

ہندوستان سماچار / عطاءاللہ